ԵՐԵՎԱՆ, 13 ապրիլի – Sputnik. ՀՀ պարետ, փոխվարչապետ Տիգրան Ավինյանն այսօր արտակարգ դրության երկարացման հարցով հրավիրված ԱԺ հատուկ նիստում հայտարարեց, որ ՀՀ բնակչության 12 տոկոսը կամ 353 000 մարդ 60 տարեկանից բարձր են և գտնվում են կորոնավիրուսային հիվանդության ռիսկի խմբում։ Բացի տարիքային խմբից, ռիսկային խմբում են նաև խրոնիկ տարբեր հիվանդություններ ունեցող անձինք (շաքարային դիաբետ, սրտանոթային հիվանդություններ), որոնց թիվը հասնում է 300 հազարի` միայն պաշտոնապես գրանցված դեպքերով։
«Ավելի ռիսկային խմբում են այն քաղաքացիները, որոնք ունեն միաժամանակ մի քանի խրոնիկ հիվանդություն և գտնվում են բարձր տարիքային խմբում»,– ասաց Ավինյանը։
Ավինյանը հայտնեց նաև, որ ներկա պահին ՀՀ առողջապահական համակարգը ունի 1700 հիվանդի հիվանդանոցային պայմաններում սպասարկելու հնարավորություն։
«Ինչը նշանակում է, որ ամենամեղմ հաշվարկներով դա մեզ թույլ է տալիս ունենալ 4500 ակտիվ վարակակիր»,– ասաց նա։
ՀՀ պարետը նաև նշեց, որ տեղորոշման գործիքի կիրառման արդյունքում հայտնաբերվել են 315 հիվանդի հետ շփում ունեցած 3029 անձ, որոնք ներառված չեն եղել հիվանդությունների կանխարգելման կենտրոնի ցուցակներում ու ո՛չ մեկուսացված են եղել, ո՛չ էլ ինքնամեկուսացած։
«Սա նշանակում է` 3000 հավելյալ անձ կա, որոնք 14 օրվա ընթացքում կարող են դառնալ վարակակիրներ»,– ասաց Ավինյանը` հավելելով, որ այդ բոլոր անձանց հետ կապ է հաստատվել, նրանցից 21-ը թեստավորվել են, 4-ի մոտ հաստատվել է կորոնավիրուսի առկայությունը։
Փոխվարչապետը նաև հայտնեց, թե ինչ կլիներ, եթե Հայաստանում արտակարգ դրություն չհայտարարվեր։
«Արդեն այսօրվա դրությամբ մենք կունենայինք 30 000 վարակված անձ միայն Երևանում և արդեն իսկ հարյուրավոր մահեր»,– ասաց նա։
Ըստ Ավինյանի` այս մտահոգությամբ է, որ կառավարությունը որոշել է ևս մեկ ամսով երկարացնել արտակարգ դրության ժամկետը։
ՀՀ կառավարությունն այսօր հրավիրված արտահերթ նիստում միաձայն ընդունեց հանրապետությունում արտակարգ դրության ռեժիմը 30 օրով երկարաձգելու որոշումը։ Այն կտևի մինչև 2020 թվականի մայիսի 14-ը` ժամը 17:00-ն ներառյալ։
Հայաստանում կորոնավիրուսով վարակվածների թիվը հասել է 1039–ին։
