ԵՐԵՎԱՆ, 31 մարտի - Sputnik. Արցախի նախագահ Բակո Սահակյանը Արցախի համապետական ընտրություններին մասնակցելուց հետո լրագրողների հետ զրույցում ասաց, որ պատրաստ է դատարանում միջնորդություն ներկայացնել նաև ՀՀ երրորդ նախագահ Սերժ Սարգսյանի համար, եթե նման քայլի կարիք կլինի։
ԼՂՀ նախագահների քայլը Հայաստանի և Արցախի մոտեցում է, ոչ թե հակառակը. Քոչարյանի փաստաբան
«ՀՀ երկրորդ և երրորդ նախագահների հանդեպ դատական գործերը, բնականաբար, չի կարող հաճույք պատճառել ո՛չ ինձ, ո՛չ էլ Արցախի ու Հայաստանի քաղաքացիներին։ Հարցն այն է, որ մենք խոսում ենք առաջնորդների մասին, որոնք ժամանակին ղեկավարել են ազգային ազատագրական պայքարը, իրենց մասնակցությունը բերել բանակաշինության գործում»,–ասաց Սահակյանը։
Նկատառմանը, թե նրանց օրոք Մարտի 1 է եղել ու 10 մարդ զոհվել, և մինչ օրս չկան մեղավորներ, Սահակյանն արձագանքեց, որ իրենք, միջնորդություն ներկայացնելով ՀՀ երկրորդ նախագահ Ռոբերտ Քոչարյանի համար, իրավական գնահատական չեն տվել։
Սահակյանը նշեց` անձնական երաշխավորություն են ներկայացրել Քոչարյանի ազատ արձակման համար՝ հաշվի առնելով այն հանգամանքը, որ խոսք է գնում մարդկանց մասին, որոնց մասնակցությունը հայ ժողովրդի նորագույն պատմության մեջ դժվար է չգնահատել։ Ուստի, ըստ նրա, իրենք պարտավոր էին վերաբերմունք ցուցաբերել։
Արցախի նախագահները Քոչարյանին կալանքից ազատելու համար 1 մլն դրամ գրավ են վճարել
Հիշեցնենք` 2019–ի մայիսի 14-ին ԼՂՀ նախկին և ներկա նախագահներ Բակո Սահակյանն ու Արկադի Ղուկասյանը ՀՀ երկրորդ նախագահ Ռոբերտ Քոչարյանին կալանքից ազատելու երաշխավորագիր էին ներկայացրել դատարան։ Մինչ այդ` գործի նախաքննության փուլում, Արցախի նախագահները նույնաբովանդակ միջնորդություն էին ներկայացրել նաև ՀՀ գլխավոր դատախազին։
Մայիսի 15–ին դատարանը բավարարեց միջնորդությունը և Քոչարյանն ազատ արձակվեց։ Սակայն մեկ ամիս անց` հունիսի 25–ին, Վերաքննիչ քրեական դատարանը կրկին նրան կալանավորելու որոշում կայացրեց` բավարարելով դատախազ Պետրոսյանի, տուժողի և նրա ներկայացուցիչ Սեդա Սաֆարյանի վերքննիչ բողոքները։
Ինչ վերաբերում է Սերժ Սարգսյանի դեմ հարուցված քրգործին, նրան մեղադրանք է առաջադրվել գյուղացիներին դիզելային վառելանյութ հատկացնելիս ֆինանսական խախտումներ իրականացնելու համար։
ՀՀ երրորդ նախագահը մեղադրվում է 2013թ.-ին «Ֆլեշ» ընկերության նկատմամբ հովանավորչություն ցուցաբերելու մեջ։ ՍՊԸ–ն հաղթել է դիզելային վառելիք առաքելու պետական մրցույթում, թեև առավել բարձր գին է առաջարկել, քան նրա մրցակիցը (մոտավորապես մեկ միլիոն դոլար տարբերությամբ)։ Սարգսյանի նկատմամբ խափանման միջոց է ընտրվել երկրից չհեռանալու մասին ստորագրությունը:
Արցախի նախագահները Քոչարյանին կալանքից ազատելու խնդրանքով դիմել են ՀՀ գլխավոր դատախազին
