Ռոբերտ Քոչարյանի պաշտպանների խումբը. արխիվային լուսանկար

Քոչարյանի պաշտպանները կարծում են, որ դատական նիստը մտածված է տապալվել

52
(Թարմացված է 15:58 17.03.2020)
Ալումյանը կասկած հայտնեց՝ նիստը հետաձգվել է, որ հետագայում չհաջողվի ապահովել բոլոր երաշխավորների միաժամանակյա ներկայությունը դատարանում։

ԵՐԵՎԱՆ, 17 մարտի – Sputnik. ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանն այսօր լրագրողներին ասաց, որ նախկին նախագահի պաշտպանները պատշաճ կերպով չեն ծանուցվել այսօր նշանակված դատական նիստի հետաձգման մասին։

Քիչ առաջ հայտնի էր դարձել, որ ՀՀ երկրորդ նախագահ, Մարտի 1-ի գործով ամբաստանյալ Ռոբերտ Քոչարյանի և մյուսների գործով դատական նիստն այսօր չի կայանա։ Sputnik Արմենիայի հետ զրույցում Քոչարյանի պաշտպան Հովհաննես Խուդոյանը հայտնել էր, որ նիստը հետաձգվում է, քանի որ նախագահող դատավոր Աննա Դանիբեկյանը վատառողջ է։ Քոչարյանը դեռ հիվանդանոցում է գտնվում։

Նշենք, որ այսօր ժամը 13-ին նախատեսված նիստի ժամանակ պետք է ՀՀ նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի Հանրապետության նախկին վարչապետ Անուշավան Դանիելյանը դատարանում հանդես գային ՀՀ երկրորդ նախագահ Ռոբերտ Քոչարյանի խափանման միջոց կալանքը անձնական երաշխավորությամբ փոխելու առաջարկությամբ (այժմ նա կալանքի տակ է)։

Ռոբերտ Քոչարյանին «Նաիրի» ԲԿ-ից տեղափոխել են մեկ այլ բուժկենտրոն

Փաստաբանները Երևանի ընդհանուր իրավասության դատարան էին եկել ու դատական կատարածուներից ու դատավորի օգնականներից պահանջել պաշտոնապես ու պատշաճ կերպով ծանուցել դատի հետաձգման ու նոր նիստի օրվա մասին։

Պաշտպանական կողմը կարծում է, որ դատական նիստը կանխամտածված է հետաձգվել, քանի որ նախօրեին ստացել էին երաշխավորության դիմաց Քոչարյանի ազատման մասին` փաստաբանների միջնորդագիրը։ Ալումյանը կասկած հայտնեց՝ նիստը հետաձգվել է, որ հետագայում իրենց չհաջողվի ապահովել բոլոր երաշխավորների միաժամանակյա ներկայությունը դատարանում։ 

Ալումյանը զգուշացրեց, որ դատավոր Աննա Դանիբեկյանի առողջական վիճակի մասին հանգամանալից տեղեկանք է պահանջելու։

Պաշտպանն ասաց` Քոչարյանին հասցրել են այն վիճակի, որ նրան հիվանդանոց են տեղափոխել, ու նա ստացիոնար բուժման կարիք ունի։

Հիշեցնենք, որ 2019 թվականի մայիսին դատավոր Դավիթ Գրիգորյանը Արցախի ներկա և նախկին նախագահներ Բակո Սահակյանի և Արկադի Ղուկասյանի անձնական երաշխավորությամբ ազատ էր արձակել Ռոբերտ Քոչարյանին։

Սակայն հունիսի 25-ին Վերաքննիչ դատարանի դատավոր Արմեն Դանիելյանը բեկանել էր այդ որոշումը և կալանքի տակ վերադարձրել Քոչարյանին։

ՀՀ 2–րդ նախագահ Ռոբերտ Քոչարյանին մեղադրանք է առաջադրվել 2008 թ.–ի մարտի 1-ի բողոքի ակցիաները ցրելու ժամանակ սահմանադրական կարգը տապալելու համար։ Նա իրեն ուղղված մեղադրանքները քաղաքական հետապնդում է համարում։ 2018թ-ին Քոչարյանին երկու անգամ ձերբակալեցին: 2019 թվականի հունիսի վերջին նա ձերբակալվեց երրորդ անգամ:

Քոչարյանը հիվանդանոցից հիվանդանոց է տեղափոխվել ախտորոշման համար. Սողոմոնյան

52
թեգերը:
Հայաստան, պաշտպան, Դատարան, Հայկ Ալումյան, Ռոբերտ Քոչարյան
թեմա:
Ռոբերտ Քոչարյանի գործը (387)
Ըստ թեմայի
Հայտնի է` երբ կհրապարակվի Քոչարյանի քրգործը կարճելու` փաստաբանական թիմի միջնորդության ակտը
Սահմանադրական կարգը սյուն չէ, որ տապալել լինի. Ռոբերտ Քոչարյանի պաշտպան
Աննա Դանիբեկյանը մերժեց Քոչարյանի պաշտպանների՝ իրեն ներկայացրած բացարկի միջնորդությունը