ԵՐԵՎԱՆ, 5 մարտի – Sputnik. Անձնակազմի շրջանում նոր կորոնավիրուսային վարակի ներթափանցման կանխարգելման նպատակով ՀՀ զինված ուժերում իրականացվում են մի շարք ժամանակավոր միջոցառումներ։ Տեղեկությունը հայտնում է ՀՀ պաշտպանության նախարարությունը։
«Ռազմաբժշկական հաստատություններում խստացվել է անցագրային ռեժիմը, մուտքը թույլատրվում է միայն հսկիչ անցագրային կետերում ջերմաչափում կատարելուց հետո՝ բժշկական պաշտպանիչ դիմակներով, ռազմաբժշկական հաստատություններում դադարեցվել են պլանային հետազոտման և բժշկական օգնության կարիք ունեցող զինծառայողների ընտանիքների անդամների, երկարամյա ծառայության և հաշմանդամության զինվորական կենսաթոշակ ստացող նախկին զինծառայողների, ինչպես նաև մարտական գործողությունների մասնակիցների և այլ շահառուների բժշկական օգնության ու սպասարկման կազմակերպումը»,– նշված է ՊՆ–ի հաղորդագրության մեջ։
Մեկ օր բանակում. լուսանկարներ` զինվորների կյանքից և առօրյայից
Ըստ նախարարության` պետության կողմից երաշխավորված անվճար և արտոնյալ պայմաններով բժշկական օգնության ու սպասարկման ուղեգրերի տրամադրումն իրականացվում է հսկիչ-անցագրային կետերից՝ բացառելով վերջիններիս մուտքը ստորաբաժանումների տարածք։
«Շարքային կազմի պարտադիր զինծառայողներին տրամադրվում է արձակուրդ միայն «Զինվորական ծառայության և զինծառայողի կարգավիճակի» մասին ՀՀ օրենքի 28-րդ հոդվածի 6-րդ մասի 2-րդ և 3-րդ կետերով նախատեսված հիմքերի առկայության դեպքում»,– հայտնում է ՊՆ–ն:
Նշված օրենքի առաջին կետով զինծառայողին արձակուրդ է տրամադրվում, եթե նա երեխա է ունենում կամ ընտանիքի անդամներից որևէ մեկն ամուսնանում է, ծանր հիվանդանում կամ մահանում։
Օրենքի մյուս կետով զինծառայողին արձակուրդ է տրամադրվում վեց ամիսը մեկ անգամ։
Հրաժեշտ բանակին. երևանյան զորամասում օդ են թռցնում զորացրվողներին. տեսանյութ
