Վահագն Վերմիշյան

Վահագն Վերմիշյանն ազատվեց աշխատանքից

131
Կառավարության նիստի օրակարգում էր նաև քաղաքաշինության պետական կոմիտեի նախագահ Վահագն Վերմիշյանին աշխատանքից ազատելու հարցը։

ԵՐԵՎԱՆ, 27 փետրվարի — Sputnik. ՀՀ կառավարության որոշմամբ քաղաքաշինության պետական կոմիտեի նախագահ Վահագն Վերմիշյանն ազատվեց աշխատանքից։

Վերմիշյանի` ազատման հարցը կառավարության չզեկուցվող հարցերի մեջ էր, ուստի այն անգամ չքննարկվեց։

Վահագն Վերմիշյանն այժմ կալանավայրում է, նա ձերբակալվել էր փետրվարի 5-ին։

Հիշեցնենք` ԱԱԾ–ն տվյալներ էր ստացել, որ Վահագն Վերմիշյանը շինարարական աշխատանքներ ծավալող անձանց կամ կառուցապատող ընկերությունների ներկայացուցիչների հետ ձեռք է բերել պայմանավորվածություններ և ինչպես անձամբ, այնպես էլ մտերիմի միջոցով 5 դեպքով խոշոր և առանձնապես խոշոր՝ 1-2.5 մլն ՀՀ դրամի չափով կաշառք է ստացել։ Դրա դիմաց Վերմիշյանը 2019թ. ընթացքում նրանց օգտին կատարել է գործողություններ կամ նպաստել է ցանկալի որոշումների արագ կայացմանը և տրամադրմանը:

Բացի այդ, ՀՀ քաղաքաշինության կոմիտեի նախագահը 2019թ. հոկտեմբերի 23-ին իր աշխատասենյակում տեղի ունեցած հանդիպման ժամանակ պայմանավորվածություն է ձեռք բերել մի քանի շինարարական ընկերությունների սեփականատիրոջը «Հայաստանի վաստակավոր շինարարի» կոչման ներկայացնելու համար։ Դրա դիմաց նա որպես կաշառք է ստացել 2.379.950 դրամին համարժեք 5000 ԱՄՆ դոլար գումար և շուրջ 2.300.000 ՀՀ դրամին համարժեք շինանյութ։

Նրան մեղադրանք էր առաջադրվել առանձնապես խոշոր չափի կաշառք ստանալու համար։

Վերմիշյանի անցած ճանապարհը կմոռացվի, իսկ կաշառքը կմնա

Վերմիշյանի գործով անցնողներից մեկը Քննչական կոմիտեի Երևանի քննչական վարչության նախկին պետ Ջոն Ֆարխոյանն է։ ԱԱԾ-ն նրան կալանավորելու վերաբերյալ միջնորդություն էր ներկայացրել դատարան, և այն նույնպես բավարարվել էր։ Սակայն Ֆարխոյանի պաշտպաններն իրենց հերթին միջնորդել էին գրավի դիմաց ազատ արձակել Ֆարխոյանին։ Դատարանը բավարարել է նրա պաշտպանների միջնորդությանը, և Ֆարխոյանն ազատ է արձակվել։

131
թեգերը:
պաշտոնյա, Կաշառք, Վահագն Վերմիշյան, ՀՀ կառավարություն, Հայաստան
Ըստ թեմայի
Վերմիշյանին բերման չեն ենթարկել. ԱԱԾ աշխատակիցը մանրամասներ է ներկայացնում
«Ամենաբարձրաստիճան ձերբակալությունը»․ Փաշինյանը խոսել է Վերմիշյանի մասին
Նրա ձերբակալությունը տխուր և ուրախ իրադարձություն է. Փաշինյանը վիրավորված է Վերմիշյանից
Արխիվային լուսանկար

Վտանգավոր է առողջության համար․ ո՞ւմ է հակացուցված նեղ հագուստը

23
(Թարմացված է 21:39 19.09.2020)
Բարձր գոտիով ջինսեր, նեղ բլուզներ կամ պատյան-շրջազգեստներ ընտրելիս պետք է հիշել, որ դրանք վնաս են հասցնում առողջությանը։

ԵՐԵՎԱՆ, 16 սեպտեմբերի – Sputnik. Մարմինը չափազանց սեղմ գրկող հագուստը որոշ հիվանդությունների դեպքում ոչ միայն անհարմար է, այլև՝ հակացուցված, ռադիո Sputnik-ին տված հարցազրույցում ասել է աղեստամոքսաբան Նուրիա Դիանովան։

Մասնագետի կարծիքով, վտանգ կարող են ներկայացնել բարձր գոտիով ջինսերը։ Չնայած այդպիսի տաբատները շահեկան կերպով ընդգծում են կազմվածքը, սակայն աղեստամոքսային համակարգի հիվանդությունների դեպքում դրանք չի կարելի կրել։ Սուր գաստրիտի դեպքում այդպիսի ջինսերը կարող են ավելի ուժեղացնել ցավերը։

«Գաստրիտը գոտկատեղի հատվածում է, իսկ «բարձրահասակ» ջինսերը սեղմում են մարմնի հենց այդ հատվածը։ Քայլելիս դա առանձնապես չի զգացվում, բայց հենց նստում ենք՝ այդ հատվածը սեղմվում է, ներորովայնային ճնշումն ավելանում է, հետևաբար՝ ճնշում է գործադրվում ստամոքսի վրա։ Եթե այդ պահին մարդը գաստրիտի սրացում ունի, ցավերը կարող են սաստկանալ»,-բացատրել է Դիանովան։

Նա ավելացրել է, որ եթե առկա է ռեֆլյուքսային հիվանդություն, ապա բարձր գոտիով ջինսերը հակացուցված են․ ճնշումը մարդու մոտ ուժգին այրոց է առաջացնում։

Բեռնաթափման օրեր. ինչպես մեկ օրում մաքրել օրգանիզմը և նիհարել

Եվ խոսքը միայն ջինսերի մասին չէ․ ցանկացած նեղ հագուստ, ինչպես նաև ձիգ կապված գոտին կարող են անհարմարություն առաջացնել նման հիվանդություններյ ղեպքում։

Ինչպես նշել է Դիանովան՝ էրոզիայի, խոցերի և ռեֆլյուքսային հիվանդության դեպքում խորհուրդ է տրվում հրաժարվել ձիգ գոտիներից և նեղ հագուստից։ Կորսետները, շատ նեղ բլուզները, պատյան-շրջազգեստները, տղամարդկանց դեպքում՝ slim-size հագուստը որովայնի շարժման համար տեղ չեն թողնում։

23
թեգերը:
բժիշկ, հիվանդություն, հագուստ
Ըստ թեմայի
«Ամուսնուս խնդրել եմ ինձ համար հագուստ չգնել». անկեղծ զրույց Լուսինե Բադալյանի հետ
Հիշողությունը պետք է ոչ միայն մարզել, այլև ճիշտ սնել․ 5 մթերք, որոնք կօգնեն լավացնել միտքը
Ձմերուկի օգուտն ու վնասը. ում խորհուրդ չի տրվում օգտագործել այն
Երևան. արխիվային լուսանկար

«Հին Երևանի» մի մասն այս տարի կբացվի, մնացածի հարցը բարդ է. բնակիչները շատ փող են ուզում

66
(Թարմացված է 22:00 19.09.2020)
«Հին Երևան» նախագծի հեղինակ Լևոն Վարդանյանը Sputnik Արմենիային պատմել է, թե ինչ ընթացքի մեջ է արդեն 15 տարի շարունակվող ծրագիրը։ Ճարտարապետը հայտնել է նաև, թե ինչ խնդիրներ կան ծրագրում բնակիչների, ներդրողների ու նաև քանդված հուշարձանների քարերի հետ կապված։

ԵՐԵՎԱՆ, 19 սեպտեմբերի– Sputnik Արմենիա. «Հին Երևան» ճարտարապետական նախագծի Արամի և Բյուզանդի փողոցների հատվածն առաջիկայում կբացվի։ Տեղեկությունը Sputnik Արմենիային հայտնեց նախագծի հեղինակ Լևոն Վարդանյանը։

«Արամի և Բյուզանդի փողոցների կառուցապատման աշխատանքներն այս տարի կավարտվեն։ Այն հատվածներում, որտեղ շինարարությունն ընթանում էր, մնացել է միայն կենտրոնական ծածկը, և բակի կողմից կան փայտե պատշգամբներ, որոնց վրա դեռ աշխատանք կա անելու։ Դեռ ավարտին չեն հասցրել նաև հետիոտնային տարածքների, մայթերի աշխատանքները։ Բայց դրանք այս տարի կավարտենք»,– ասաց Վարդանյանը։

Օրինակ` Միրզոյան եղբայրների պատմական շենքն այս տարի կբացվի, բայց դալանը, որով հետիոտները կկարողանան մտնել երևանյան փոքրիկ բակը, դեռ փակ կմնա։

Ինչ վերաբերում է նախագծի մնացած հատվածներին, այստեղ, Լևոն Վարդանյանի խոսքով, աշխատանքներն իրացման լուրջ խնդրին են բախվել ու դեռ հայտնի չէ, թե այդ հարցը երբ կլուծվի։

Հին Երևանը՝ միայն առաջին հարկում. 2800 տարվա կորսված պատմությունը

«Մեր ժողովրդին գիտեք, էլի, նենց թվեր են ասում։ Վերջիվերջո, ամեն մի ապրանք իր գինն ունի։ Բայց նրանք ֆանտաստիկ գներ են ասում 1քմ–ի համար»,– ասաց Վարդանյանը։

Վարդանյանի հաշվարկով` եթե ամեն բան հարթ ընթանա, ապա 2 տարի անց կբացվի նաև Աբովյան– Քոչինյան հատվածը։ Իրացման տեսակետից` ամենաբարդը Քոչինյանից Կողբացի հատվածի հարցն է։

Բնակիչների հետ բանակցությունները նրանց տարածքների իրացման շուրջ` շարունակվում են, բայց ճարտարապետը հույս ունի, որ հաջորդ տարի շինարարությունը կմեկնարկի նաև այդ տարածքներում։

«Մոտ 60 տոկոսն է մինչև էսօր իրացված, կա իրացվելիք 30 տոկոս, որտեղ բարդություններ կան։ Բնակիչների հետ աշխատանքներ են սկսվել, որոնք դեռ չգիտենք` ինչով կավարտվեն։ Մենք սպասում ենք, որ գոնե մի ինչ–որ տարածք մաքուր լինի, որ կարողանանք շինարարական աշխատանքներ սկսել»,– ասաց Վարդանյանը։

Չիրացվածության հետևանքով, ըստ ճարտարապետի, առաջանում է նաև երկրորդ խնդիրը` կապված կառուցվող ու վերակառուցվող շենքերի ֆունկցիոնալ նշանակության հետ։ Տարիներով ձգձգումներն անորոշություններ են առաջացնում նաև հենց ներդրումային ծրագրերում։

«Եթե պատվիրատուն մի քանի տարի սպասում է, որ իրացման աշխատանքները վերջանան, ինքը սկսի շինարարությունը, ինքն ինչպե՞ս կարող է այդպիսի անորոշ ժամանակահատվածում որևէ կոնկրետ ֆունկցիայի մասին խոսել։ Այնտեղ կոնկրետ կտոր կա նախկին Աստաֆյան ֆողոցում (ներկայում` Աբովյան,–խմբ.), որ հստակ գիտենք` հյուրանոց է լինեու։ Բայց, օրինակ, եկամտաբեր տները, որոնք, գիտեք` վերևը բնակելի են, ներքևը` հասարակական նշանակության, փորձում ենք իրենց նախկին ֆունկցիային համապատասխան հոթել-ապարտամենտ սկզբունքով տուրիստներին վարձակալության տալու համար տարածքներ կառուցել։ Թեև կոնկրետ ֆունկցիաներ դեռևս գոյություն չունեն»,– ասաց Վարդանյանը։

«Հին Երևան» նախագծի հեղինակ Լևոն Վարդանյանը նշում է, որ կառուցապատման ենթակա ամբողջ տարածքում 3 տեսակի հուշարձաններ կան` տեղում պահպանվող, տեղափոխվող և վերաստեղծվող։

Ռուսերեն ու գերմաներեն հայհոյող և հայերեն խոսող «գուշակ» թութակը. կյանքը հին Երևանում

Տեղափոխվող հուշարձաններն ամենավատ վիճակում են։ Վարդանյանը պատմում է, որ երբ ինքը սկսեց զբաղվել ծրագրով, տեղափոխման նպատակով քանդված հուշարձանների համարակալված քարերի մի մասն արդեն ավիրված էր։

«Քանդված բոլոր շենքերի քարերի տեղերը գիտեմ, թե որտեղ են։ Բայց մինչև այդ քարերը չբերենք, չփռենք, նորից չսկսենք վերստեղծել այդ շենքերը, քարերի վիճակի մասին չենք կարող վերջնական բան ասել, որովհետև տեղեր կան, որ ուղղակի կույտերով «սամասվալ արած» է»,– ասաց նա` հավելելով, որ կորած ու ավիրված քարերի փոխարեն հետագայում` շենքի վերաստեղծման ժամանակ, ստիպված են լինելու նոր քարեր բերել ու լրացնել։

Վարդանյանը նշում է, որ այն պահից, ինչ ինքն է ղեկավարում ծրագիրը, ապամոնտաժվել է միայն մեկ հուշարձան` Պուշկինի փողոցում գտնվող Աֆրիկյանների եկամտաբեր տան շենքը։

«Ես, հասկանալով, թե ինչ պետք է լինի, գնացել, կանգնել եմ Աֆրիկյանների տան աշխատանքների գլխին, բերել եմ ապամոնտաժողներին, նրանք ապամոնտաժել են։ Այնտեղ մենք ունենք Աֆրիկյանների շենքի ճակատային մասին բոլոր քարերը` 100 տոկոսով, առանց վնասելու»,– ասում է նա։

Երևանի կենտրոնում «Հին Երևան» պատմաճարտարապետական միջավայր ստեղծելու մասին առաջին անգամ սկսեցին խոսել 2005թ–ին։ Հենց այդ տարիներին էլ Երևանի կենտրոնական թաղամասերը` Փավստոս Բյուզանդի, Եզնիկ Կողբացու, Արամի փողոցների շենքերն ու տները հանրային գերակա շահ հռչակվեցին։

Նախագիծը նախատեսված է իրականացնել շուրջ 2.2 հեկտարի վրա։

Նոր Երևանը՝ հին երևանցիների աչքերով

66
թեգերը:
Երևան, «Հին Երևան» նախագիծ
Ըստ թեմայի
Հայաստանի կառավարությունը հողատարածք է հատկացրել «Հին Երևան» նախագծի համար
«Հին Երևանի»` խախտումներով շինարարություն իրականացնելու դեպքով քրգործ է հարուցվել
Ինչու է Փաշինյանը շարունակում նախկինների հակասական նախագծերը, կամ ինչ եղավ «Հին Երևանը»
Ալեքսանդր Լիստենգորտ

Դուդուկ նվագող ու հայերեն բանաստեղծություններ գրող հրեան, կամ սեր առաջին հայացքից

0
(Թարմացված է 21:40 19.09.2020)
Ալեքսանդրը 27 տարեկան է։ Նա 9 լեզու գիտի ու կարծում է, որ դրանց առնվազն կեսը հայերենն ուսումնասիրելու շնորհիվ է կարողացել սովորել։

«Օբյեկտիվորեն ես հայ չեմ։ Ես նույնիսկ ռուս չեմ. ես հրեա եմ։ Բայց... հոգով», - ասում է 27–ամյա Ալեքսանդր Լիստենգորտը, որը մի քայլող պատմություն է։ Նրա մասին կարելի է երկար գրել, բայց մենք դա հակիրճ կանենք։

Ալեքսանդրը բանասեր է, գրող, էզոտերիկ, ապրում է Մոսկվայում, պրոֆեսիոնալ մակարդակով զբաղվել է հայերենով, աշխատել է Ռուսաստանում Հայաստանի դեսպանատանը, հայերեն բանաստեղծություններ է գրում ու նույնիսկ դուդուկ է նվագում։ Ինչպե՞ս է դա ստացվել։ Միանգամից հերքենք մտքով անցած առաջին վարկածը՝ ո՛չ, Սաշայի երակներում ոչ մի կաթիլ հայկական արյուն չի հոսում, ու միանգամից հրաժարվենք երկրորդ վարկածից՝ ո՛չ, Սաշան ամուսնացած չէ հայուհու հետ։

Александр Листенгорт
© Photo : AGEYKINA / provided by Alexanmder Listengort
Ալեքսանդր Լիստենգորտ

«2010 թվականին ընդունվեցի Մոսկվայի պետական լեզվաբանական համալսարան, որտեղ պետք է օտար լեզու ընտրեինք։ Չորս տարի հայերեն ուսումնասիրեցի, իսպաներեն էլ սովորեցի։ Հայերենը միանգամից դյութեց ինձ իր տառերով, հնչողությամբ, արմատներով։ Ես իմ ուսուցչի՝ Ռուզաննա Հակոբովնայի հետ առանձին էի պարապում, ազատ ժամանակ Թումանյան, Սայաթ-Նովա էի կարդում, Վահան Արծրունու, Ռուբեն Հախվերդյանի, Արթուր Մեսչյանի երգերն էի լսում․․ Հիմա էլ հայ ռեփերների եմ լսում՝ Մոս, Մեծ Հայք, Հայկո․․․», - ասում է Լիստենգորտը։ 

«Էնպես կխաղամ, դեռ կտեսնես…»․ անկրկնելի Գայլա Նովենցի կյանքի ու դերերի մասին

Որքան ավելի էր մեր հերոսը խորանում հայերենի ուսումնասիրության մեջ, այնքան ավելի էր համոզվում, որ հայերենը սուրբ ու հոգևոր լեզու է։ Հանգամանքների բերումով, 2014 թվականին համալսարանն ավարտելուց հետո նրան հրավիրեցին պրակտիկան անցկացնելու Ռուսաստանում Հայաստանի դեսպանատանը։ Նա երեք ամիս աշխատեց դեսպանատան մամուլի ծառայությունում։

Александр Листенгорт
© Photo : provided by Alexanmder Listengort
Ալեքսանդր Լիստենգորտ

«Հետաքրքիր էր, որ ինձ` ոչ հայիս ու ՌԴ քաղաքացուս, հրավիրեցին Հայաստանի դեսպանատուն։ Նույն տարվա մեջ Հայաստան եկա՝ հանգստանալու ու ճանապարհորդելու։ Այցելեցի գեղեցիկ վայրեր, մայիսյան տոներին (Շուշիի ազատագրման օրը,-խմբ․) շրջեցի Արցախում, տեսա Ստեփանակերտը, Շուշին, Գանձասարը, մի խոսքով՝ բոլոր տեսարժան վայրերը։ Նույն տարվա ընթացքում որոշ ժամանակ անց Թուրքիա մեկնեցի։ Հասկացա, որ եթե ուզում եմ լավ հասկանալ Հայաստանի պատմությունը, պետք է նաև Թուրքիայի պատմությունը իմանամ», - ասում է Ալեքսանդրը։

Դիմակով հարսնացու, անկոստյում փեսացու, օնլայն հյուրեր. «կորոնավիրուսային» հարսանիքները

Հայերենը Սաշայի սովորած երրորդ օտար լեզուն էր․ նա դպրոցական տարիքից անգլերեն ու գերմաներեն գիտեր։ Հայերենից հետո Լիստենգորտը դեռ համալսարանում իսպաներեն սովորեց, հետո արդեն գործն ինքն իրեն առաջ գնաց` սովորեց եբրայերեն, թուրքերեն, ֆրանսերեն ու արաբերեն։ Նշում է, որ լինելով հրեա, հայերենը եբրայերենից շուտ է սովորել, բայց միանգամից բացատրում է՝ ինչու։

«Եբրայերենը Իսրայելի, ոչ թե հրեաների լեզուն է։ Հայերի մոտ ինչպե՞ս է` հայն աշխարհի ցանկացած ծայրում հայերեն է խոսում։ Հրեաների մոտ մի փոքր այլ է. նրանք խոսում են իրենց ապրած պետության լեզվով։ Սակայն բարդ հայերենն ուսումնասիրելուց հետո ինձ համար շատ ավելի հեշտ էր այլ լեզուներ սովորել, ու ես շատ ուրախ եմ դրա համար։ Փորձում հնարավորինս շատ մարդկանց գրավել իմ լեզուներով», - նշեց Լիստենգորտը։

Александр Листенгорт
© Photo : provided by Alexanmder Listengort
Ալեքսանդր Լիստենգորտը «ծիրանային պատերազմի» ժամանակ

Սաշան փորձում է իր գրքերով «գրավել» մարդկանց։ Կորոնավիրուսի համավարակի ընթացքում նա պարապ չի մնացել ու 3 գիրք է գրել․վերջինը կհրապարակվի տարեվերջին։ Երեք գրքերն ընդհանուր վերնագրով լույս կտեսնեն՝ «Զարթոնքի նոր փուլ»։ Նախորդ գրքերը լույս են տեսել «Վերադարձ աստղերին» ու «Տոնախմբություն երկրի վրա» խորագրերի ներքո։ Լիստենգորտը հոգևոր պրակտիկաներ է ուսումնասիրում ու 14 տարեկանից հետաքրքրվում է տարբեր կրոններով։ Ասում է, որ Հայաստանն իր համար հետաքրքրություն է ներկայացնում նաև այդ համատեքստում։

Ամուսնություն ծերուկի հետ. մի աղջկա սարսափելի պատմություն, որը Ավրորա Մարդիգանյան չդարձավ

«Կարծում եմ, որ միայն հայկական ու վրացական եկեղեցիներն են պահպանել իսկական քրիստոնեական ոգին, մյուս քրիստոնեական եկեղեցիներն այս տարիների ընթացքում բիզնես խարդախությունների վայր են դարձել։ Հայկական ու վրացական եկեղեցիներում զգում ես այն ոգին, որի մասին խոսել է Հիսուսը։ Աստվածաշնչի հայերեն թարգմանությունը շատ մոտ է Թորային։ Բացի այդ, հայկական կրոնը քրիստոնեության ու հեթանոսության հետաքրքիր համադրություն է. միայն Վարդավառն ինչ ասես` արժե։ Գրաբարը սուրբ լեզու է, իսկ ծիրանենուց պատրաստած դուդուկն իսկապես ապաքինող ձայն ունի», - ոգևորված պատմում է Ալեքսանդրը։

Александр Листенгорт
© Photo : provided by Alexanmder Listengort
Ալեքսանդր Լիստենգորտ

Սաշան Հայաստանի ու հայերի հետ կապված բազում նախագծեր է իրականացրել։ Օրինակ, նա ռուսերեն է թարգմանել Ռուբեն Հախվերդյանի երգերը, հրապարակել է ու նույնիսկ նվիրել է գիրքը Հախվերդյանին։ Բացի այդ, նա պատրաստվում է ցույց տալ հայերի ու հրեաների նմանությունը, համադրել Իսրայելում հայկական եկեղեցիներն ու թաղամասերը, Հայաստանում հրեական գերեզմանատների ու սինագոգները։ Այս ամենով հանդերձ, սակայն, Սաշան վստահեցնում է, որ հրեաները հայերի համեմատ մի առավելություն ունեն։ 

Թուրքերը տղային նետել են կամրջից, բայց նա փրկվել է. հայ Մաուգլիի անհավանական պատմությունը

«Հիանում եմ հայ ժողովրդով, բայց նրանք համախմբվածության ու միմյանց հանդեպ սիրո պակաս ունեն։ Հայերն անընդհատ մրցում են միմյանց հետ նույնիսկ Ցեղասպանության հիշատակին միջոցառումներ կազմակերպելու հարցում։ Հրեաների մոտ նման բան չի եղել։ Հայերին որ հարցնում ես՝ ե՞րբ եք Հայաստան վերադառնալու, ասում են՝ երբ լավ լինի։ Իսկ հրեաները անապատ գնացին ու այնպես արեցին, որ այնտեղ լավ լինի», - ժպիտով ասում է Լիստենգորտը։

Սաշան խոստանում է նորից Երևան գալ ու անձամբ հանդիպել Sputnik Արմենիայի հետ` արդեն հրապարակված երրորդ գրքով ու Հայաստանի հանդեպ սերն արտահայտելու նոր միջոցներով։

Վերջում ներկայացնենք ձեզ Ալեքսանդրի գրած հայերեն բանաստեղծություններից մի քանիսը.

Երկնագույն Երազ

Կարմիր, կապույտ, ծիրանագույն.

Գույները հայ անկախության:

Երազ տեսա որ ինքնուրույն

Նորից կլինի Հայաստան։

 

Որ կծաղկեն լիով նորից

Նրա դաշտերը ծաղկևոտ,

Ու կսկսի ապրել սկզբից

Հայ ժողովուրդը իր բախտով։

 

Որ լաջվարդի երկնքի տակ

Մասիս վերջապես կժպտա

Որովհետև կապրի ազատ...

Արդյո°ք երազ դա կմնա..

Հայաստանի գարունը

Շատ ծաղկավետ են ծիրանի դաշտերը,

Շատ սևաթույր են օրիորդի վարսերը,

Այդքան երազկոտ տղաները

Արևոտ մի երկրից հեռացել են:

 

Եվ հիմա, հեռավոր մի երկրից,

Երազում դեպի տուն ձգտելով,

Իրենց եսը հանում են սրտից,

Մշուշում ցրված թափառելով:

 

Քո արևոտ լճերի մեջ

Քո արևոտ լճերի մեջ

Ես մի ծառն եմ սիրով ծաղկող,

Քո բազմագույն դաշտերի մեջ

Ես մի ծաղիկն եմ փայլով բացվող։

 

Քո մեղրահամ հովիտների մեջ

Ես մի կաթն եմ քնքուշ հոսող

Քո մանուշակ երկնքի մեջ

Ամպ եմ լեռներիդ վրա նստող։

 

Քո հիացնող սարերի մեջ

Լիալուսին եմ, ոսկուց դեղնած

Եվ սկիզբ չկա, չկա և վերջ

Կյանքում սիրո մեջ ապրած։

0
թեգերը:
հրեա, հայ
Ըստ թեմայի
50 երկրով շրջագայած ամերիկացին տուն է գնել հայկական գյուղում և ապրում է իր կենդանիների հետ
Արևահաց, արևախաչ, գինի ու կրակ. ինչպես են հայ հեթանոսները նշել Նավասարդը
Երևանում ապրած ու Հայոց ցեղասպանության մասին ֆիլմ նկարած ադրբեջանցին ու 2 հայ եղբայրները