ԵՐԵՎԱՆ, 26 փետրվարի — Sputnik. 1991–ի Անկախության հանրաքվեի «Այո»–ի` արդեն իսկ հայտնի նկարի հեղինակը, ամենայն հավանականությամբ, Ստյոպա Նարոյանն է (նկարը հրապարակվել է «Երեկոյան Երևան» օրաթերթի սեպտեմբերի 23-ի համարում)։ Տեղեկությունը Sputnik Արմենիայի հետ զրույցում հայտնեց 1991թ.–ին «Երեկոյան Երևան» օրաթերթի խմբագիր Նորայր Ենգիբարյանը։
Նշենք, որ երեկ ներկայացվեց սահմանադրական հանրաքվեի «Այո» քարոզչական կողմի տարբերանշանը, որը, պարզվեց, նոր չէ։ «Ոչ» քարոզչական նախաձեռնության անդամ Արսեն Բաբայանը Facebook սոցցանցի իր էջում 90-ականների մամուլից մի լուսանկար էր հրապարակել, որը 1991-ի անկախության հանրաքվեի «Այո»-ի քարոզն է ներկայացնում։ Լուսանկարում զանգի մեջ պատկերված «Այո»-ն կրկնում է «Այո» քարոզչական կողմի տարբերանշանը։
«Լայֆհաք». ինչպես ստեղծել 3 միլիոն դրամանոց «Այո՛» տարբերանշան
«Այդ տարիներին երկու հոգի էին մեզ հետ աշխատում` Նարոյան Ստյոպան և Ցոլակ Ղանդիլյանը։ Նարոյանն արդեն մահացել է, իսկ Ղանդիլյանը Նկարիչների միության անդամ է` հայտնի նկարիչ է։ Իմ հիշելով` հենց Նարոյանն է հեղինակը»,–ասաց Ենգիբարյանը։
Նա հայտնեց նաև, որ այդ տարիներին լուսանկարչական ապարատ չունեին, ձեռքով էին նկարում թերթի շապիկի նկարները։ «Այո»–ի նկարը թերթի սեպտեմբերի 23-ի համարի նկարն է։
Ցոլակ Ղանդիլյանը մեզ հետ զրույցում հայտնեց, որ ինքը չէ նկարի հեղինակը։ Այսինքն` ստացվում է, որ Նարոյանն է հեղինակը։
Հիշեցնենք, որ «Այո»–ի այս տարբերանշանի համար նախատեսվել էր 3 մլն դրամ։ «Այո» քարոզչության կողմի լիազոր ներկայացուցիչ, «Իմ քայլի» պատգամավոր Վահագն Հովակիմյանը Sputnik Արմենիայի հետ զրույցում ասել էր` եթե ապացուցվեց, որ կրկնօրինակն է, ՔՊ-ն հայտարարությամբ հանդես կգա։
Ավելի ուշ «Այո» շտաբի պետ Սուրեն Պաիկյանը հայտարարեց, որ այդ գումարը որոշել են երեք տեղ բաշխել։
