Հայկ Մարությանը «Կամազ» մակնիշի ավտոմեքենաների մոտ

«ԿամԱԶ»–ների թեման հանգիստ չի տալիս պատգամավորներին. նրանք 2 օրինագիծ են պատրաստել

39
(Թարմացված է 14:16 12.02.2020)
Պետք է նշել ոչ միայն նվերի արժեքը, այլ նաև նվիրատուներին, որպեսզի նրանք հետո տարաբնույթ արտոնություններ չստանան իշխանություններից։

ԵՐԵՎԱՆ, 12 փետրվարի — Sputnik. Ազգային ժողովի այսօրվա նիստում շարունակվեցին Երևանի քաղաքապետարանին նվեր տված «ԿամԱԶ»–ների թեմայով քննարկումները։ Օրինագծեր ներկայացրին ընդդիմադիր 2 ուժերը` «Բարգավաճ Հայաստանն» ու «Լուսավոր Հայաստանը»։

ԲՀԿ–ի պատգամավորների ներկայացրած օրինագծով առաջարկվում է բացահայտել տեղական ինքնակառավարման մարմիններին արված խոշոր նվերները, համայնքների նկատմամբ էլ պարտադիր պահանջ դնել, որ 100 հազար դրամը գերազանցող նվիրատվությունների կամ նվերների մասին տեղեկությունը հրապարակեն իրենց պաշտոնական կայքերում ոչ ուշ, քան ստանալուց հետո մեկ շաբաթվա ընթացքում: Պատգամավորներն առաջարկում են բացահայտել ոչ միայն նվերի արժեքը, այլ նաև նվիրատուներին, որպեսզի ապագայում նրանք քաղաքապետարանից ինչ–որ արտոնություններ չստանան։

«Լուսավորներն» էլ նմանատիպ օրինագիծ ներկայացրին, բայց նվերների ու նվիրատվությունների ավելի բարձր նշաձողով` 1 միլիոն դրամ։ Բացի դրանից, նրանք առաջարկեցին ցանկացած նման նախաձեռնություն ներկայացնել Երևանի ավագանու հաստատմանը։

Պատգամավոր Նաիրա Զոհրաբյանն առաջարկեց ավելի խիստ միջոց. Երևանի ավագանին պետք է որոշի` ընդունի նման նվերները, թե ոչ։

Ոչ թե կաշառք, այլ կորպորատիվ սոցիալական պատասխանատվություն. Մակունցը` «ԿամԱԶ»–ների մասին

«Ես կուզեի, որ կամազներն էլ, բելազներն էլ, ձյուն մաքրող մեքենաներն էլ անպայման անցնեին ավագանու նիստով։ Դուք ասում եք՝ չի կարող հայտնվել քաղաքապետի տանը, ես էլ ասում եմ՝ կարող է, որովհետև արդեն ունեցել ենք տխուր պատմություններ, որ նվիրատվություն արված ինչ-որ մի տեխնիկա «պատահաբար» հայտնվել է այս կամ այն պաշտոնյայի դաչայում։ Ուստի ցանկացած նման նվեր պետք է հաստատի քաղաքային խորհուրդը», – ասաց նա։

Օրինագծին անդրադարձան նաև տարածքային կառավարման և ենթակառուցվածքների երկու փոխնախարարները։ Ավելի երիտասարդ Լիլյա Շուշանյանն անցավ հակագրոհի.

«Դուք, տիկին Զոհրաբյան, 12 տարի խորհրդարանում եք։ Ինչո՞ւ նման նվերները այսպես չէիք քննադատում նախորդ իշխանության օրոք»։

Ավելի փորձառու Վաչե Տերտերյանը վեճի մեջ չմտավ, ավելին` նա նշեց, որ նման օրինագծերն օգնում են տեղական ինքնակառավարումն ավելի թափանցիկ և ազատ դարձնել անօրինական դրսևորումներից։

«Իմ քայլի» պատգամավորները ոչ մեծ վերապահում արեցին։

«Որքան էլ կարևոր լինեն օրինագծերը, դրանք չպետք է անձնական վրեժի հարցեր լուծեն։ Անկեղծ լինենք, այստեղ մենք գործ ունենք նման դեպքի հետ», – ասաց պատգամավոր Վլադիմիր Վարդանյանը։

Հիշեցնենք, որ Երևանի քաղաքապետարանը 2019 թվականի աշնանը 20 «ԿամԱԶ» էր նվեր ստացել։ Դրանցից մի քանիսը նվիրել էր գործարար Սամվել Ալեքսանյանի անվան հետ կապվող ընկերությունը։

39
թեգերը:
«ԿամԱԶ», ԱԺ, Հայաստան
Ըստ թեմայի
Հայկ Մարությանը բացատրել է` ինչու է իրեն օգնում կինը
Հայկ Մարությանն էլ է դժգոհ Երևանի մայթերի վիճակից, բայց նա բացատրություն ունի
Մարությանն ուզում է 100 նոր ավտոբուս ձեռք բերել, բայց փողից բացի այլ խնդիր էլ կա