Ալեն Սիմոնյանն ու Արարատ Միրզոյանը. արխիվային լուսանկար

«Սա մարտավարություն է». ինչու է «Իմ քայլը» հետ կանչել ԱԺ արտահերթ նիստի նախագծերը

34
(Թարմացված է 12:39 06.02.2020)
ԱԺ փոխնախագահ Ալեն Սիմոնյանը խորհրդարանում պատասխանել է լրագրողների հարցերին, թե ինչու է փոշմանել իշխող քաղաքական ուժը։

ԵՐԵՎԱՆ, 6 փետրվարի – Sputnik. Այսօր ԱԺ–ում արտահերթ նիստը հետաձգվելուց հետո ԱԺ փոխնախագահ Ալեն Սիմոնյանը լրագրողների հետ զրույցում ասաց` որևիցե գաղտնիք չկա, որ սա արվում է ՍԴ շուրջ ստեղծված ճգնաժամը լուծելու համար։

«Այո՛, քաղաքական որոշում է կայացվել։ ՍԴ–ում առկա ճգնաժամը լուծում է ստանալու որպես մի վերջին բաստիոն, որը մնացել է հին Հայաստանից»,– ասաց Սիմոնյանը։

Անդրադառնալով արտահերթ նիստի օրակարգից հետ կանչված նախագծերին ու դրանց փոխարեն նորերը ներկայացնելու որոշմանը, ԱԺ փոխնախագահը չցանկացավ բացել փակագծերը։

«Նախկին բաստիոնների անկումը բուռն է լինում». Թորոսյանը հայտարարեց՝ ով է գործում իր դեմ

«Կբերենք նոր նախագիծ, որովհետև կարծում ենք, որ այդպես ավելի ճիշտ կլինի։ Թե ինչու հետ կանչվեց, ես ձեզ հստակ հիմա չեմ ասելու։ Սա մարտավարություն է»,–ասաց նա։

Հիշեցնենք` Աժ արտահերթ նիստի օրակարգում ընդգրկված էր 2 հարց` «Ազգային ժողովի կանոնակարգ», «Հանրաքվեի մասին» և «Սահմանադրական դատարանի մասին» օրենքներում փոփոխութփյուններ կատարելու նախագծերը և «ՀՀ Սահմանադրությունում փոփոխություններ կատարելու մասին օրենքի նախագիծը»։

Վերջինով առաջարկում է 2015 թվականի դեկտեմբերի 6-ին փոփոխված Սահմանադրության 213-րդ հոդվածը շարադրել նոր խմբագրությամբ` մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի նախագահի և անդամների պաշտոնավարումը դադարում է:

«Հրայր Թովմասյանը նախորդ իշխանության վերջին բաստիոնն է». Ալեն Սիմոնյան

Նույն հոդվածը նախատեսում է նաև նրանց թափուր մնացած տեղերի լրացման կարգը։ Նոր թեկնածուներին պետք է առաջադրեն հաջորդաբար` կառավարությունը, հանրապետության նախագահը և դատավորների ընդհանուր ժողովը:

«Սույն փոփոխություններով հոդվածի 1-ին մասի հիման վրա առաջացած թափուր տեղերը համալրելու ընթացակարգը և ժամկետները սահմանվում են «Սահմանադրական դատարանի մասին» սահմանադրական օրենքով նախատեսված հատուկ ընթացակարգով, որոնք պետք է ընդունվեն և ուժի մեջ մտնեն մինչև 2020 թվականի ապրիլի 1-ը»,–նշված էր նախագծում։

Նախագիծն ընդունվելու դեպքում փոփոխություններն ուժի մեջ պետք է մտնեին պաշտոնական հրապարակմանը հաջորդող օրվանից:

Ընդ որում, օրակարգի մնացած նախագծերով առաջարկվում էր, որ ընդունվելու դեպքում նոր դրույթն օրենքի ուժ ստանա առանց ՀՀ նախագահի ստորագրության ու առանց ՀՀ ՍԴ կողմից Սահմանադրությանը համապատասխանող ճանաչվելու, քանի որ առաջարկվող փոփոխությունները հենց այդ կարգավորումն էին նախատեսում։

Բոզոյան․ «ՍԴ-ն վերջին բաստիոնն է, որ փորձում է գրավել Նիկոլ Փաշինյանը»

Արտահերթ նիստի առաջին րոպեներին, սակայն, ԱԺ նախագահ Արարատ Միրզոյանը հայտարարեց, որ «Իմ քայլը» խմբակցությունը հետ է կանչել իր երկու նախագծերը` «ըստ երևույթին ինչ–որ տեխնիկական խնդիրների պատճառով»։

Նա նաև հայտնել է, որ իշխող խմբակցությունն այսօր կրկին միջնորդել է ԱԺ արտահերթ նիստ հրավիրելու համար։

ԱԺ Խորհուրդն այսօր նիստ կգումարի ԱԺ արտահերթ նիստի ժամը որոշելու համար։ Արարատ Միրզոյանը հայտնել է միայն, որ արտահերթը նախատեսվում է այսօր, ուստի ԱԺ նախագահը կոչ է արել պատգամավորներին չհեռանալ խորհրդարանի շենքից։

34
թեգերը:
Հրայր Թովմասյան, արտահերթ նիստ, Սահմանադրական դատարան, Արարատ Միրզոյան, «Իմ քայլը» դաշինք, Հայաստան, Ալեն Սիմոնյան
Ըստ թեմայի
Հրայր Թովմասյանի համար նոր վերջնաժամկետ է սահմանվում. հարցը կորոշվի ԱԺ արտահերթ նիստով
Սահմանադրական դատարանում ստեղծված իրավիճակը շուտով կհանգուցալուծվի. Փաշինյան
Կարող է ձևավորվել նոր Սահմանադրական դատարան. նախարարը չի բացառում