ԵՐԵՎԱՆ, 4 փետրվարի – Sputnik. ԱԺ «Իմ քայլը» խմբակցության պատգամավոր Ռուբեն Ռուբինյանն ու «Լուսավոր Հայաստանի» ղեկավար Էդմոն Մարուքյանն այսօր խորհրդարանում խայթեցին իրար։
«Լուսավոր Հայաստանի» ղեկավար Էդմոն Մարուքյանը, մեկնաբանելով ԵԽԽՎ համազեկուցողների և Վենետիկի հանձնաժողովի ղեկավարի հայտարարությունները, նշեց, որ գործող իշխանությունն ունի մի մեծ «շնորհք»` անիմաստ տեղը, ինչ–որ ցածր վստահություն ունեցող որևէ մեկին դարձնելու հերոս (խոսքը ՍԴ նախագահ Հրայր Թովմասյանի մասին է. խմբ.):
«Երկու հայտարարություններն էլ իշխանությունը սխալ է մեկնաբանել` հօգուտ իրենց։ Ես` որպես քաղաքական մարդ, ընկալում եմ, որ այս հայտարարության հեղինակներն իշխանությանն ասում են` այն գործողությունները, որոնք դուք կիրառում եք, իսկ դա փունջ է գործողությունների, դա մի արեք, լարվածություն է առաջացնում։ Հիմա անիմաստ հերոսացման արդյունք է, որի մասին ես նախկինում արտահայտվել եմ»,-ասաց նա:
Մարուքյանը պնդեց, որ հայտարարություններն ուղղված են իշխանությանը, որպեսզի իշխանությունն իր գործողությունները համապատասխանեցնի իրավունքի գերակայության և ժողովրդավարության չափանիշներին, այլապես այս հայտարարությունները վաղը դառնալու են զեկույց համազեկուցողների ձեռքին։
Այս հայտարարությունը դուր չեկավ ԵԽԽՎ-ում հայկական պատվիրակության ղեկավար Ռուբեն Ռուբինյանին։
«Եթե իշխանությունը տաղանդ ունենար ցածր ռեյտինգ ունեցող անձանց անիմաստ հերոս դարձնելու, դուք վաղուց հերոս կլինեիք պարոն Մարուքյան»,– ասաց նա։
«Այսինքն` ես ունեմ ցածր ռեյտի՞նգ: Մի հատ ինձ հետ դուրս եկեք փողոց, տեսեք ձեզ կճանաչե՞ն: Պետք է մտածեն, որ իմ ուսապարկը տանողն եք»,– պատասխանեց Մարուքյանը:
Ռուբինյանը վստահեցրեց, որ Մարուքյանը խեղաթյուրված է ներկայացնում իրավիճակը:
Նշենք, որ Վենետիկի հանձնաժողովի նախագահ Ջիանի Բուքիքիոն երեկ Հայաստանի ՍԴ-ի շուրջ ստեղծված իրավիճակի վերաբերյալ հայտարարություն էր տարածել և կողմերին կոչ էր արել զսպվածություն ու փոխադարձ հարգանք ցուցաբերել:
Հունվարի 31-ին էլ հայտարարություն էին տարածել ԵԽԽՎ Մոնիթորինգի հանձնաժողովի՝ Հայաստանի հարցերով համազեկուցողներ Անդրեյ Շիրցելը և Կիմմո Կիլջունենը հունվարի 31-ին։
