ԵՐԵՎԱՆ, 20 հունվարի — Sputnik. ԲՀԿ առաջնորդ Գագիկ Ծառուկյանը ԱԺ–ում լրագրողների հետ ճեպազրույցում ասաց, որ ծննդատների փակմանը բացասաբար է վերաբերվում։
Ինչու են ծննդկանին շտապօգնության մեքենայով Երևան տեղափոխել. բողոքի ակցիա Եղվարդի ծննդատանը
ՀՀ առողջապահության նախարարությունը փոփոխություններ է նախատեսել ծննդատների աշխատանքում և որոշել է տարեկան 150–ից պակաս ծնունդ ընդունող ծննդատները փակել։ Նախարարությունն այս տարի դեռ չի ֆինանսավորել Մարալիկի, Աչաջուրի, Արտենիի, Ծաղկահովիտի, Արծվաբերդի, Քաջարանի և Եղվարդի ծննդատներին։
«Ուզում ենք տնտեսական հեղափոխություն, ներգաղթ լինի։ Հիմա 30-35 գյուղի մեկ հիվանդանոց է սպասարկում, ու այն փակելը ճիշտ չի։ Այնպես որ, դա անելու բան չի, որ անում են»,–ասաց Ծառուկյանը։
Նա կարծում է, որ փակելու փոխարեն` պետք է այդ ծննդատները պահեն ու զարգացնեն։
Մարալիկում լարված իրավիճակ է. բնակիչները փակել են Գյումրի–Երևան ճանապարհը. լուսանկարներ
Հիշեցնենք, որ Եղվարդի ծննդատան աշխատողները երկու օր անընդմեջ բողոքի ակցիա էին արել։ Առողջապահության նախարարության պահանջած տարեկան 150 ծնունդ ցուցանիշին ամենամոտը Եղվարդի ծննդատան 2019–ի ցուցանիշն է (136 ծնունդ)։ ՀՀ առողջապահության նախարար Արսեն Թորոսյանը հայտնել էր` Առողջապահության նախարարության մասնագետները ևս մեկ անգամ կայցելեն այնտեղ` ստուգայցի։
Օրերս Շիրակի մարզի Անի խոշորացված համայնքի Մարալիկ քաղաքի բնակիչներն էլ փակել էին Գյումրի–Երևան ճանապարհը։ Նրանք պահանջում էին չեղարկել Մարալիկի առողջության կենտրոնի ծննդաբերական բաժանմունքի փակման որոշումը։ Ի դեպ, ըստ տվյալների` 2018 թվականին Մարալիկի առողջության կենտրոնի մանկաբարձական ծառայությունից օգտվել է 126 ծննդկան, իսկ 2019-ին` 105:
Եղվարդի ծննդատունը չի՞ փակվի. նախարարի հետ բանակցություններ են տարվում
