ԵՐԵՎԱՆ, 31 դեկտեմբերի — Sputnik. Հայաստանի Հանրապետության նախագահ Արմեն Սարգսյանը շնորհավորական ուղերձ է հղել հայ ժողովրդին` Հայաստանում, Արցախում և սփյուռքում ապրող բոլոր հայերին, տեղեկացնում են նախագահի մամուլի ծառայությունից։
«Շուտով կշրջենք մեր պատմության 2019թ.–ի էջը, կշրջենք ապագայի հանդեպ հույսով և հավատով, նոր ակնկալիքներով ու սպասումներով։ 2019–ը ազգային ու պետական նպատակները նորովի ուրվագծելու տարի էր։ Մեր առաջնահերթ խնդիրներն ու գերակայությունները չեն փոխվել։ Սակայն 2020–ին մեր հույսերը պետք է վերափոխվեն ու շարունակական ձևով դառնան գործնական քայլեր։ Բոլորիս մաղթում եմ ողջամտություն, կարգապահություն, կազմակերպվածություն և առողջ դատողություն, պատասխանատվություն և, իհարկե, հանդուրժողականություն»,–ասված է նախագահի ուղերձում։
Սարգսյանը նշել է, որ ամեն Աստծո օր մենք մտածում ենք մեր մեծ ու փոքր ընտանիքների` մեր տան ու մեր հայրենիքի մասին։ Նրա խոսքով` ընտանիքից է սկսվում մեր միացյալ հայրենիքի` Հայաստանի և Արցախի անվտանգությունն ու պաշտպանությունը։ «Մեր հավաքական կամքն Արցախում, Հայաստանում և սփյուռքում ունի դրսևորման մեկ ճակատ` Հայաստանի և Արցախի անվտանգությունն ու հզորությունը»,–ասել է ՀՀ նախագահը։
Նա մաղթել է, որ եկող տարում սերը, համերաշխությունն ու հանդուրժողականությունը իշխող լինեն բոլոր ընտանիքներում, իշխող լինեն նաև քաղաքական և հասարակական կյանքում։
«Ապագան հիմնված է գիտելիքի և նոր տեխնոլոգիաների վրա։ Հայաստանը կարող է և պետք է դասվի այն երկրների շարքին, որոնք փոքր են, սակայն հաջողակ են ու հզոր և ունեն իրենց լսելի ձայնը։ Մենք ունենք շատ հստակ առավելություն, փոքր երկիր ենք, բայց համաշխարհային ազգ։ Եկեք դառնանք համաշխարհային նավահանգիստ համաշխարհային տվյալների օվկիանոսում»,–նշել է Սարգսյանը։
Նրա խոսքով` անհնար է հաջողության հասնել բարոյականության և մշակույթի անապատում։ Նախագահը հորդորում է հանդուրժող լինել միմյանց, սակայն անհանդուրժող հասարակության պարսավելի երևույթների հանդեպ։ «Հայրենիքը չի կարող տնտեսապես հզոր դառնալ, եթե այնտեղ գերակայողը օրենքը չէ։ Մենք պետք է օրենքի երկիր լինենք ոչ միայն լավ օրենքներ ընդունելով, այլ դրանք կիրառելով»,–ասել է նա։
Շնորհավորելով բոլորին Ամանորի կապակցությամբ` Արմեն Սարգսյանը մաղթել է, որ 2020թ.–ը լինի նոր ձեռքբերումների և հաղթանակների տարի, որ խաղաղությունն ու հաջողությունն ուղեկցեն մեր երկրին, մեր քաղաքացիներին, մեր ժողովրդին` Հայաստանում, Արցախում և սփյուռքում և յուրաքանչյուրի ընտանիքում։
Զարհուրելի զվարճանք երեխաների համար, կամ ինչ հոտ ունի նախատոնական Գյումրին
«Առանձնահատուկ բարեմաղթանքներ եմ հղում բոլոր զինծառայողներին, պատերազմի հաշմանդամներին և նահատակված հերոսների ընտանիքներին, միայնակ կամ ծերանոցում ապրող մարդկանց, բազմազավակ մայրերին, առողջապահության աշխատակիցներին, նրանց խնամքի տակ գտնվող հիվանդներին և մեր երկրի մանուկ քաղաքացիներին»,–ասել է նախագահը։
Արմեն Սարգսյանն իր խոսքի վերջում հայցել է, որ Աստված պահապան լինի մեր հայրենիքին և աշխարհասփյուռ հայ ժողովրդին։
