ԵՐԵՎԱՆ, 25 դեկտեմբերի — Sputnik. «Տոր» զենիթահրթիռային համալիրների և ՍՈւ–30 կործանիչների փոխգործակցությունը փորձարկվել է դեռևս սիրիական պատերազմում։ Sputnik Արմենիայի հետ զրույցում ասաց Ռազմավարության և տեխնոլոգիաների վերլուծության կենտրոնի (CAST) տնօրեն Ռուսլան Պուխովը`խոսելով Հայաստանի կողմից ձեռք բերված նշված զինատեսակների մասին։
Դեկտեմբերի 21-ին ՀՀ վարչապետ Նիկոլ Փաշինյանը հայտնել էր, որ ՀՀ ԶՈւ–ն ժամանակակից «Տոր-Մ2ԿՄ» զենիթահրթիռային համալիրներ է ստացել։
«Հաշվի առնելով Հայաստանի փոքր ռեսուրսները` սպառազինության պարկի ցանկացած թարմացում օգտակար է, և ուժեղացնում է անվտանգությունը։ Հատկապես, որ Ադրբեջանն ու Թուրքիան, ինչպես նաև Վրաստանն ու Իրանը բավականին լուրջ զինվում են, ամեն երկիր «իր ճաշակով»», – ասաց Պուխովը։
Հայաստանի կողմից ժամանակակից սպառազինությունների ստացումը որոշակի առումով վերականգնում է ուժերի այն հավասարակշռությունը, որը մի շարք պատճառներով վերջին մի քանի տարվա ընթացքում խախտվել էր ի օգուտ մյուս խաղացողների։
Հրթիռներ կան, մնում են ինքնաթիռները. Հայաստանն ուժեղացնում է պաշտպանությունը
Նրա խոսքով` ռուսական զենիթահրթիռային համալիրներն ավանդաբար ստեղծվում են խոցելու ոչ միայն ինքնաթիռները, այլև բալիստիկ զենքերը։ Սակայն, առաջին հերթին, խոսքը ինքնաթիռների մասին է ու ինչ-որ տեղ նաև ԱԹՍ–ների։
«Ռուսաստանը «Տոր» համալիրները հաջողությամբ փորձարկել է Սիրիայում սկզբում ոչ իրական անօդաչուների դեմ։ Անօդաչուների դար է, նույն Ադրբեջանն այսօր ակտիվորեն ձեռք է բերում դրանք։ Ապրիլյան սրացման ժամանակ, ինչպես գիտեք, Ադրբեջանը բավական հաջողությամբ կիրառում էր ԱԹՍ–ներ», – ասաց Պուխովը։
Փորձագետի խոսքով` բոլոր այս հանգամանքները հաշվի առնելով, չէր խանգարի ԱԹՍ–ների դեմ պայքարելու հնարավորություն ստեղծել։
«Տոր»–ը լավ և արդյունավետ համակարգ է, դրա փոխգործակցությունը փորձարկվել էր նաև ՍՈւ–30 կործանիչների հետ։ Հայաստանն առաջին խմբաքանակը կստանա առաջիկայում։
«Բնականաբար այդ ամենը փորձարկվել է և՛ Ռուսաստանում, և՛ Սիրիայում։ Մի բան է, երբ այդ համակարգերը ցրված են այնպիսի մեծ երկրում, ինչպես ՌԴ–ն է, և մեկ այլ բան` Հայաստանի նման փոքր տարածքը», – ասաց Պուխովը։
Անցնող տարին նշանավորվել է նոր սպառազինությունների ձեռքբերմամբ. Դավիթ Տոնոյան
Պաշտպանության նախարար Դավիթ Տոնոյանը հայտնել է, որ Ռուսաստանից գնված Սու–30ՍՄ չորս կործանիչները Հայաստանում կլինեն 2020 թվականի հունվար–փետրվարին։ Հայտնի է նաև, որ Հայաստանը հետագայում մտադիր է ևս մի քանի նման ինքնաթիռ ձեռք բերել։
Միացյալ ավիաշինարարական կորպորացիայից Sputnik Արմենիայի հարցմանն ի պատասխան հայտնել են, որ ռուսական բազմաֆունկցիոնալ Սու–30ՍՄ կործանիչների մատակարարումը Հայաստան իրականացվում է պայմանագրերի համապատասխան։
