Նազիկ Ամիրյան

Մանվել Գրիգորյանի կինը յուրացրել է պետական գույքը. իրավապահների նոր բացահայտումը.տեսանյութ

409
(Թարմացված է 19:27 08.11.2019)
Կոտայքի մարզի Բյուրեղավան գյուղում գտնվող բյուրեղապակու գործարանն ապօրինի կերպով սնանկացրել են ու յուրացրել պետության գույքը։

ԵՐԵՎԱՆ, 8 նոյեմբերի — Sputnik. Իրավապահները պարզել են «Հայապակի» ընկերության գույքն օտարելու և խարդախությամբ հափշտակելու անօրինական սխեմաները։

Բացահայտված փաստերով հարուցվել է քրեական գործ, հայտնում է դատախազությունը։

Հրապարակած հաղորդագրության համաձայն` Կոտայքի մարզի Բյուրեղավան գյուղում գտնվող «Հայապակի» ՓԲԸ-ի կանոնադրական կապիտալը կառավարության 2001թ.–ի որոշմամբ գնահատված է եղել 717 մլն դրամ։

Նույն որոշմամբ, ընկերության 80 տոկոս սեփականության բաժնետոմսերը (574 մլն ՀՀ դրամ արժողությամբ), ընդամենը 145 մլն դրամով օտարվել են Ն. Ա.-ին՝ 3 տարվա ընթացքում 250 մլն ՀՀ դրամի ներդրումներ կատարելու ու 700 աշխատատեղ ապահովելու պարտադիր պայմանով: Մեր տեղեկություններով` նշված անձը նախկին պատգամավոր, ԵԿՄ նախկին նախագահ Մանվել Գրիգորյանի կինն է` Նազիկ Ամիրյանը։

Նոր սեփականատերը, սակայն, ոչ միայն «Հայապակի» ՓԲԸ-ն վերածել է «Հայբյուրեղապակի» ԲԲԸ-ի, այլև իր նշանակած տնօրենի միջոցով դիտավորյալ չի կատարել պարտավորությունները, չի վճարել հարկերը, ինչի հետևանքով 2003թ.–ին ընկերությունը դատարանի վճռով սնանկ է ճանաչվել:

Իսկ սնանկության գործընթացում սնանկության գործով կառավարիչը գործարանի ամբողջ գույքը գնահատել է ընդամենը 121.3 մլն դրամ և կազմվել ակնհայտ կեղծ գնահատման հաշվետվություն։

Այդ ընթացքում գործարանի սեփականատեր Ն. Ա.-ն իր մտերիմ գործարար Ա. Ք.-ի հետ նոր ընկերություն է հիմնել, որը մասնակցել է 2004թ.-ին լուծարային կառավարիչի կողմից կազմակերպված ձևական աճուրդին ու եղել աճուրդի միակ մասնակիցը։

Արդյունքում «Հայբյուրեղապակի» ԲԲԸ-ն նորաստեղծ ընկերությունը ձեռք է բերել 121.3մլն դրամով։

Իսկ Նազիկ Ամիրյանն իր կազմակերպած մեքենայությունների արդյունքում, լուծարային կառավարիչի օժանդակությամբ, խաբեությամբ հափշտակել է «Հայապակի» ՓԲԸ-ի՝ առանձնապես խոշոր չափերով՝ 571.166.000 ՀՀ դրամ արժողությամբ պետական գույքը` փաստացի անտեսելով գործարանի բաժնետոմսերի 20 տոկոսի սեփականատերերի իրավունքները:

Կեղծ փաստաթուղթ պատրաստելու և օգտագործելու առերևույթ հանցագործությունների դեպքերի առթիվ հարուցված քրեական գործը դատախազությունն ուղարկել է Քննչական կոմիտե՝ նախաքննություն կատարելու։

409
թեգերը:
Կոտայք, չարաշահում, Ոստիկանություն
Ըստ թեմայի
Տնօրենները յուրացրել են «ֆեյք» աշխատակիցների աշխատավարձերը, վաճառել դպրոցի ալյուրը
«Տնային պայմաններում միայնակ տարեցների սոցսպասարկման կենտրոնի» տնօրենը գումար է յուրացրել
Շենգավիթի նախկին ղեկավարը տնտեսվարողներից խոշոր գումար է հավաքագրել և յուրացրել. տեսանյութ