ԵՐԵՎԱՆ, 6 նոյեմբերի — Sputnik. ««Ժողովուրդ» օրաթերթի տեղեկություններով` օրերս մայրաքաղաքի «Տոսպիա» ռեստորանում հավաքվել են ՀՀ բոլոր դատարանների նախագահները:
«Խնդիրն այն է, որ ՀՀ վճռաբեկ դատարանի և Բարձրագույն դատական խորհրդի ջրերը մի առվով չեն հոսում»,–գրում է թերթը:
Վճռաբեկի նախագահ Երվանդ Խունդկարյանը, օրաթերթի տեղեկություններով, փորձում է ապացուցել, որ ԲԴԽ-ն չի կարող իրենց ասել` ինչը ինչպես անել: Եվ ահա ռեստորանում դատավորների հավաքի սեղանին մեկ հարց է եղել` քննարկել դատարանների նախագահների երբեմնի խորհրդի վերականգնման հնարավորությունը և ԲԴԽ-ին հակակշիռ ստեղծել:
ԲԴԽ նախագահ Ռուբեն Վարդազարյանը «Ժողովուրդ» թերթի հետ զրույցում հաստատել է` հավաքվել են, ինքն էլ է ներկա եղել ռեստորանային այդ հավաքին, ողջունել է նույնիսկ Խունդկարյանի նախաձեռնությունը: Բայց ասել է` ԲԴԽ-ն ու Վճռաբեկը հակամարտող կողմեր չեն:
Հաստատվեց. դատական համակարգի բարեփոխումը պետության վրա 20 մլրդ դրամ կնստի
«Ինքս եմ հորդորել, որ այն հարցերը, որ հուզում են դատարանների նախագահներին, ընդհանրացնեն, որպեսզի միասնական կարծիք ձևավորվի, այդ դեպքում ԲԴԽ-ն հաշվի կառնի, որ սա ձևավորված, քննարկված կարծիք է, այլ ոչ թե մեկ դատավորի»,-ամփոփել է Վարդազարյանը»,-գրում է թերթը:
Հիշեցնենք, որ 2019թ.–ի մայիսի 24-ին Բարձրագույն դատական խորհրդի նախագահ Գագիկ Հարությունյանը հրաժարականի դիմում ներկայացրեց: Հուլիսի 19–ին ԲԴԽ նախագահ է ընտրվել Ռուբեն Վարդազարյանը։
