ԵՐԵՎԱՆ, 15 հոկտեմբերի – Sputnik. Հայաստան–Ֆինլանդիա ֆուտբոլային հանդիպումից առաջ ՀՀ վարչապետ Նիկոլ Փաշինյանն իր աջակցությունն է հայտնել Հայաստանի ազգային հավաքականին։
«Հոգով և սրտով մեր ֆուտբոլի հավաքականի հետ եմ: Դուք ապացուցել եք, որ կարող եք հրաշքներ գործել. ձեզ տեսնենք, տղե՚րք»,–իր Facebook-յան էջում գրել է ՀՀ վարչապետը:
Հիշեցնենք, որ այսօր, ժամը 20։00-ին Եվրո-2020–ի ընտրական փուլի շրջանակում կկայանա Ֆինլանդիա-Հայաստան հանդիպումը։
Հայաստանի ազգային հավաքականի նախորդ հանդիպումը Լիխտենշտեյնի հետ էր։ Այն ավարտվեց ոչ ոքի` 1։1 հաշվով։
Մեր հավաքականը Լիխտեյնշտեյնի հետ հանդիպումն անցկացրեց առանց թիմի ավագի` Հենրիխ Մխիթարյանի։
Սեպտեմբերի 29-ին Իտալիայի Ա Սերիայի 6-րդ տուրի «Լեչե»-«Ռոմա» հանդիպման 87-րդ րոպեին Հայաստանի ազգային հավաքականի ավագ, «Ռոմայի» կիսապաշտպան Հենրիխ Մխիթարյանը վնասվածք էր ստացել և լքել խաղադաշտը։ Մխիթարյանը հոկտեմբերի 1–ին Հռոմում բուժզննման էր ենթարկվել, որի արդյունքում մեր ավագի մոտ ախտորոշվել էր ազդրի երկար առբերիչ մկանի մասնակի վնասվածք։
Հենրիխ Մխիթարյանը կկարողանա՞ մասնակցել Ֆինլանդիա-Հայաստան խաղին. բժիշկը կարծիք է հայտնել
Հռոմեական ակումբի՝ ՀՖՖ ուղարկած պաշտոնական նամակի համաձայն՝ Հենրիխ Մխիթարյանը, հավանաբար, բաց կթողնի 3 շաբաթ։ Այսպիսով, Մխիթարյանը, ամենայն հավանականությամբ, չի մասնակցի Լիխտենշտեյնի և Ֆինլանդիայի դեմ խաղերին, իսկ վերականգման ավելի հստակ ժամկետները պարզ կլինեն կրկնակի հետազոտությունից հետո։
