Նիկոլ Փաշինյան. արխիվային լուսանկար

Մարդկանց ուղղորդենք գնալ Սևան` իրենց` հավաբույն հիշեցնող օբյեկտներում հաց ուտե՞լ. Փաշինյան

425
(Թարմացված է 14:45 10.10.2019)
Եթե Սևանի կողմերում հանկարծ մի զբոսաշրջիկ հայտնվի, ում տեսնի` ասելու է`«Հայաստան հանկարծ չգնաք»։ Փաշինյանն անդրադարձել է Սևանի հանգստավայրերի բիզնեսի որակին։

ԵՐԵՎԱՆ, 10 հոկտեմբերի – Sputnik. Սևանում կապտականաչավուն ջրիմուռների առաջացման ու ծաղկման երևույթը կկրկնվի նաև 2020թ.–ի ամռանը։ Այս մասին այսօր կառավարության նիստում հայտարարեց ՀՀ շրջակա միջավայրի նախարար Էրիկ Գրիգորյանը։

«Մենք հրավիրել ենք SIS BIO համաշխարհային կազմակերպության ներկայացուցիչներին։ Նրանք որոշակի ուսումնասիրություններ են արել, մեզ զեկույց են տվել, որը փոխանցել ենք ԳԱԱ–ին։ Նաև անցյալ նիստում մենք հաստատեցինք կապտականաչ ջրիմուռների մաքրման` ԳԱԱ առաջարկած տեխնոլոգիան»,– հայտնեց նախարարը։

Գրիգորյանը կարևորեց նաև Սևանում մաքրման կայանների կառուցման հարցը։ ԵՄ–ից ակնկալվող 5 մլն եվրոյի դրամաշնորհը ևս, նրա խոսքով, ուղղվելու է Սևանի մաքրման խնդրի լուծմանը։

«Բայց միանշանակ է, որ աղտոտումների ծավալը, որը գալիս է տասնյակ համայնքներից, քաղաքներից` պետք է կտրուկ նվազեցվի։ Եթե չնվազեցվի` ռիսկերը շատ մեծ են»,–ասաց Էրիկ Գրիգորյանը։

Տիգրան Ավինյանը ԱՄՆ ֆորումում խոսել է Սևանա լճին սպառնացող վտանգի մասին 

ՀՀ վարչապետ Նիկոլ Փաշինյանն էլ հիշեցրեց, որ անցած ամռանը Սևանա լճում ջրի որակի վատթարացման ֆոնին, ափամերձ տարածքներում բիզնես իրականացնողները բողոքի ակցիա էին կազմակերպել` պահանջելով հայտարարել, որ Սևանում ամեն ինչ կարգին է։

«Հարց. իսկ իրենք իրենց գործունեության արդյունքում Սևանը չաղտոտելուն կամ աղտոտումը նվազեցնելուն ուղղված որևէ գործողություն անո՞ւմ են։ Իմ կարծիքով` հիմա Սևանի ափին կան օբյեկտներ, որոնք տեղով էկոլոգիական աղետ են։ Այդ մարդիկ իրենց գործունեությամբ աղտոտում են Սևանը և կառավարությունից պահանջում են, որ մարդկանց ուղղորդենք գնալ Սևան` իրենց աղտոտած ջրերում ու իրենց, կներեք, հավաբույն հիշեցնող օբյեկտներում հաց ուտեն»,– ասաց Փաշինյանը։

Վարչապետի խոսքով` Սևանի տարածքում բիզնեսը պետք է քաղաքակրթվի։

«Մենք զբոսաշրջության զարգացման մասին ենք խոսում, բայց եթե այդ կողմերում հանկարծ մի զբոսաշրջիկ հայտնվի, ում տեսնի` ասելու է` Հայաստան հանկարծ չգնաք»,– ասաց վարչապետը։

Սևանա լիճն այս տարի էլ կծաղկի. ջրի մակարդակի բարձրացումը կարևոր է, բայց ոչ բավարար

Շրջակա միջավայրի նախարարը հայտնեց, որ տնտեսվարողներին ժամանակ է տրվելու մաքրման կայաններ տեղադրելու։ Նրանք, ովքեր չեն ապահովի օրենքի այդ պահանջը, կդադարեցնեն իրենց գործունեությունը։  Ժամկետը դեռ որոշված չէ, բայց նախարարը հույս հայտնեց, որ օրենքն ուժի մեջ կմտնի մինչև հաջորդ ամառ, և Սևանն աղտոտող որևէ գործարար 2020թ.–ի ամռանն արդեն չի աշխատի։

425
թեգերը:
Էրիկ Գրիգորյան, Նախարար, ջրիմուռ, Զբոսաշրջիկ, Սևան, Սևանա լիճ, ՀՀ կառավարություն, Նիկոլ Փաշինյան
Ըստ թեմայի
Գրիգորյան. «Լճում տեղադրված ցանցավանդակները ևս նպաստում են Սևանում ջրիմուռների բազմացմանը»
Կանաչած Սևանում լողալը վտանգավոր է, խմելը` ավելի. Գաբրիելյանը` թունավոր ջրիմուռների մասին
«Սևանի ջրիմուռներն իջել են հատակը, բայց վտանգը չի անցել». Ստեփան Ավագյան
Հայաստանի ոսկին` Սևանա լիճը. ի՞նչ պետք է անեն իշխանություններն այն պահպանելու համար
Ո՞ւր գնալ հանգստանալու. Սևանա լիճն ԱՊՀ լավագույն հանգստավայրերի ցանկում է