Հայ–ռուսական համատեղ զորավարժություններ

Հայաստանում բարձր են գնահատել Ռուսաստանի հետ զորավարժությունները

43
(Թարմացված է 18:35 09.10.2019)
Հայաստանի ռազմական ղեկավարությունն ուզում է ընդլայնել Ռուսաստանի հետ համատեղ անցկացվող զորավարժությունների քանակն ու ինտենսիվությունը։

ԵՐԵՎԱՆ, 9 հոկտեմբերի - Sputnik. Հայ–ռուսական միացյալ զորախմբի համատեղ գումարտակային զորավարժությունները ցուցադրեցին պատրաստվածության բարձր մակարդակ, ինչպես նաև հրամանատարների և անձնակազմի մարտական պատրաստվածություն։ Այս մասին այսօր լրագրողների հետ զրույցում ասաց ՀՌՕ մարտական պատրաստվածության վարչության պետ, գեներալ–մայոր Ռամիլ Գիլյազովը։

Հայաստանի «Բաղրամյան» զորավարժարանում այսօր անցկացվեց հայ–ռուսական  միացյալ զորախմբի մարտավարական զորավարժությունների կրակային փուլը։ Մարզումներում ներգրավվել էին ավելի քան 1,5  հազար զինծառայող և ավելի քան 500 միավոր հատուկ ռազմատեխնիկա, այդ թվում հետևակի մարտական մեքենաներ, տանկեր, զրահապատ փոխադրիչներ, հետախուզման, կառավարման և կապի ժամանակակից համալիրներ, ինչպես նաև կործանիչ, գրոհային և բանակային ավիացիա։

Գիլյազովն ընդգծեց, որ իրավիճակը հնարավորինս մոտեցված էր մարտականին։ Բազմաթիվ նորություններ էին կիրառվել ինչպես զորավարժությունների ղեկավարման մեթոդներում, այնպես էլ  ստորաբաժանումների բուն գործողություններում։

«Մասնավորապես, եթե նախկինում մենք կարող էինք գնահատել զորավարժություները միայն որոշակի փուլից հետո, ապա այսօր մենք կարող ենք վերլուծել յուրաքանչյուր դրվագն առցանց ռեժիմում», – ասաց գեներալը։

Զորախմբի հրամանատար, գեներալ–մայոր Տիգրան Փարվանյանի կարծիքով` ամեն անգամ նման զորավարժություններին նոր ստորաբաժանումներ են ներգրավվում։ Այս ռոտացիան թույլ է տալիս կատարելագործել  առավելագույն թվով զինծառայողների  մարտական վարպետությունն ու հմտությունները։

Զորավարժությունների սցենարն իր հերթին ներկայացրեց ՀՀ պաշտպանության նախարարի մամուլի խոսնակ Արծրուն Հովհաննիսյանը։ Պայմանական հակառակորդը ճեղքում է պետական սահմանն ու Հայաստանի տարածք անցնում։ Այնուհետև զորախմբի ստորաբաժանումները հակահարված են հասցնում հակառակորդին, անցնում հակագրոհի և մարտական գործողությունները տեղափոխում հակառակորդի տարածք։

«Սակայն սցենարից առավել կարևոր է մարտական գործողությունների մշակումը գումարտակային և վաշտային մարտավարական խմբերի կողմից։ Բանն այն է, որ հենց այս ստորաբաժանումներն են առանցքային դեր խաղում ժամանակակից պատերազմներում։ Այս օղակների համատեղումը, ներդաշնակեցումը և  փոխգործակցությունը միմյանց հետ` մեզ համար չափազանց արդիական խնդիր է», – ասաց Հովհաննիսյանը։

Նրա խոսքով` Հայաստանն ակտիվ օգտագործում է համաշխարհային փորձը գումարտակային խմբերի տեղակայման ժամանակ։ Այդ առումով, ռուս գործընկերների հետ համագործակցությունն անհնար է թերագնահատել։

Հոլիվուդը հանգստանում է. «Բաղրամյան» զորավարժարանում հակաահաբեկչական զորավարժություններ են

Հայաստանը մարտական պատրաստվածության և փորձի փոխանակման առումով մեծ նշանակություն է տալիս  Ռուսաստանի Զու–ի հետ փոխգործակցությանը, նշեց ՊՆ ներկայացուցիչը։

«Մենք կանենք հնարավոր ամեն բան, որպեսզի մարտական հրաձգությամբ նման համատեղ մարզումների քանակը տարեցտարի աճի։ Թող այդ զորավարժություններն ավելի փոքր մասշտաբներով և ձևաչափերով լինեն, սակայն մեծ քանակի։ Դա թույլ է տալիս ավելի շատ ստորաբաժանումներ  ներգրավել, ինչպես նաև շտաբային աշխատանքի հմտություններ մշակել»,–ավելացրեց Հովհաննիսյանը։

Հայաստանի և Ռուսաստանի միացյալ զորախումբը ստեղծվել է 2016 թվականին։ Խմբավորման հիմնական խնդիրների թվում է Հայաստանի և Ռուսաստանի դեմ զինված հարձակման (ագրեսիայի) դեպքում դրա ժամանակին հայտնաբերումը և հետ մղումը, ինչպես նաև պատասխանատվության գոտիներում  երկու պետությունների պետական սահմանների ցամաքային հատվածների պաշտպանությունը։

43
թեգերը:
Բանակ, Արծրուն Հովհաննիսյան, Զորավարժություններ, զորավարժարան, Ռուսաստան, Հայաստան
Ըստ թեմայի
Պաշտպանության նախարարությունը 40 օր վարժական հավաքներ կանցկացնի
Հայաստանում 8 աղջկա շնորհվել է լեյտենանտի զինվորական կոչում
Հայաստանն ապացուցեց պահեստազորից հզոր բռունցք ստեղծելու կարողությունը. ռազմական փորձագետ