Արման Թաթոյան

«Տարիներով թալանել են մարդկանց». ՄԻՊ–ն առաջարկում է վերանայել ունեցվածքն օտարելու օրենքը

93
(Թարմացված է 13:16 07.10.2019)
Օմբուդսմանն առաջարկում է իրական փոխհատուցում տրամադրել քաղաքացիներին, որոնք ժամանակին կոպեկների դիմաց զրկվել են օթևանից։

ԵՐԵՎԱՆ, 7 հոկտեմբերի — Sputnik. «Հասարակության և պետության կարիքների համար սեփականության օտարման մասին» օրենքում անհրաժեշտ է փոփոխություններ կատարել։ Այս մասին «Պետության կողմից «Հյուսիսային պողոտա-Կասկադ» ծրագրով բացառիկ գերակա հանրային շահ ճանաչելու հետևանքով սեփականության իրավունքի ոտնահարման խնդիրները» թեմայով խորհրդարանական լսումների ժամանակ հայտարարեց Հայաստանի մարդու իրավունքների պաշտպան Արման Թաթոյանը։

Նա նշեց, որ քաղաքացիական իրավունքների խախտումները Հայաստանում շարունակական բնույթ են կրել, և օրենքը պետք է վերանայվի` ապագայում դա կանխելու համար։

Մարդու իրավունքների պաշտպանը պարզաբանումներ է պահանջում քաղաքապետից ու նախարարից

Թաթոյանի խոսքով` 2000թ.–ից քաղաքացիների գույքն օտարվել է գործադիր իշխանության որոշմամբ` անհավասար պայմաններ ստեղծելով դատավարությունների ընթացքում։  Ինչպես նշեց օմբուդսմանը, մասնավորապես, խոսքը Երևանի կենտրոնում գտնվող անշարժ գույքի մասին է։

«Երևանի բարեկարգման պատրվակով տեղի է ունեցել ունեցվածքի անօրինական և անընդունելի վերաբաժանում։ Քաղաքացիները զրկվել են իրենց տներից, որոշ ձեռնարկատերեր գերշահույթ են ստացել, իսկ ոմանք տարբեր տարածքների տեր են դարձել քաղաքի կենտրոնում», – նշեց Թաթոյանը։

Նա հավելեց, որ քաղաքացիները ոչ միայն արժանի փոխհատուցում չեն ստացել, այլ նաև հաճախ մնացել են առանց տանիքի` դառնալով չքավոր։ Թաթոյանը նշեց, որ պետությունը ոչ միայն չի պաշտպանել քաղաքացիների իրավունքները, այլ, հակառակը, ոտնահարել է` միակողմանի կարգով ընդունելով որոշումներ, որոնք ձեռնտու են կապալառուներին։

Թաթոյանը նաև ուշադրություն դարձրեց քաղաքացիական իրավունքների` այլ աղաղակող խախտումների` հիշեցնելով, որ դեպքերի ճնշող մեծամասնությունում օտարման գործընթացը տեղի է ունեցել առանց հասարակական լսումների և քաղաքացիներին ուղղակի կանգնեցրել են փաստի առաջ։

«Արամի, Ֆիրդուսի, Բուզանդի, Հանրապետության և Խանջյան փողոցներում, ինչպես նաև Կոնդում ապրած քաղաքացիների սեփականության օտարումը տեղի է ունեցել օրենքի խախտումներով։ Հետևաբար, անհրաժեշտ է վերանայել օրենքը` դրան հակադարձ ուժ տալու և տուժած քաղաքացիներին արժանի փոխհատուցում տրամադրելու համար», – ասաց նա։

Նշենք, որ կառավարության` 2000թ.–ի նոյեմբերի 25–ի որոշմամբ և դրան հետևած սեփականության օտարման և կառուցապատման մասին որոշումներով` Հայաստանում սկսվել է քաղաքացիներին սեփականությունից զրկելու գործընթացը։

Թոշակառուից ապօրինի գումար են պահանջել. միջամտել է Մարդու իրավունքների պաշտպանը

«Հանրային գերակա շահի» պատրվակով քաղաքացիների ունեցվածքի օտարումը նախապատրաստման, գնահատման, բողոքարկման և հարկադիր կատարման փուլերում իրականացվել է բազմաթիվ իրավախախտումներով, որոնք արձանագրվել են օմբուդսմանի, անկախ լրագրողների և իրավապաշտպանների կողմից, ինչպես նաև Մարդու իրավունքների եվրոպական դատարանի որոշումներում։

93
թեգերը:
ՀՀ կառավարություն, փոխհատուցում, բնակարան, Օրենք, Արման Թաթոյան, ՀՀ ՄԻՊ
Ըստ թեմայի
Դավիթ Գրիգորյանի փաստաբանները դիմել են ՄԻՊ–ին. ի՞նչ քայլեր է ձեռնարկելու Թաթոյանը
Արճիսի խմելու ջրի խնդիրը լուծելու տարբերակ կա. հարցը ՄԻՊ–ի ուշադրության կենտրոնում է
ՄԻՊ–ն արձագանքել է «Հայելի» ակումբի դեմ ոտնձգությանը