ԵՐԵՎԱՆ, 17 սեպտեմբերի — Sputnik. Պաշտպանության նախկին նախարար Սեյրան Օհանյանը Մարտի 1-ի գործով իրեն առաջադրված մեղադրանքը չի ընդունում։ Նա այս մասին ասաց այսօր` սեպտեմբերի 17-ին, Երևանի ընդհանուր իրավասության դատարանի Շենգավիթի նստավայրում դատական նիստի մեկնարկից առաջ։
«Ես այդ ժամանակ զինվորական եմ եղել։ Այն ինչ կա ցուցմունքներում, այն, ինչ կա նախաքննական մարմինների աշխատանքում, իրականություն է։ Եվ ելնելով մեր այսօրվա դատավարական գործընթացի մարտավարությունից, պաշտպանությունից` ես այսօր չեմ մեկնաբանի և չեմ խորանա»,– ասաց նա։
Նախկին նախարարը հայտարարեց նաև, որ իր համոզմամբ` 2008թ–ին սահմանադրական կարգի տապալում տեղի չի ունեցել։
Հիշեցնենք` Սեյրան Օհանյանը Մարտի 1-ի գործով մեղադրվում է ՀՀ սահմանադրական կարգն այլ անձանց հետ հանցակցությամբ տապալելու մեջ։
Երևանի ընդհանուր իրավասության դատարանի Շենգավիթի նստավայրի դիմաց այս պահին բողոքի ակցիաներ են ընթանում։ Դատարանն այսօր պետք է հրապարակի ՀՀ երկրորդ նախագահ Ռոբերտ Քոչարյանի խափանման միջոցը փոխելու միջնորդության վերաբերյալ որոշումը։
ՀՀ երկրորդ նախագահ Ռոբերտ Քոչարյանի և մյուսների գործով դատական վերջին նիստը կայացել է սեպտեմբերի 12-ին։
Դատական նիստին մասնակցում էին ինչպես Ռոբերտ Քոչարյանը, այնպես էլ ՀԱՊԿ նախկին նախագահ Յուրի Խաչատուրովը, ՀՀ պաշտպանության նախկին նախարար Սեյրան Օհանյանն ու ՀՀ երկրորդ նախագահ Ռոբերտ Քոչարյանի աշխատակազմի նախկին ղեկավար Արմեն Գևորգյանը։
Քոչարյանի պաշտպանները նրան անհապաղ ազատելու միջնորդություն էին ներկայացրել, դատախազներն էլ` Քոչարյանի խափանման միջոցը չփոխելու միջնորդություն։
ՀՀ երկրորդ նախագահը ելույթով հանդես եկավ` ասելով, որ սա ՀՀ պատմության մեջ ամենախայտառակ գործն է։
Դատարանը գնաց խորհրդակցական սենյակ` Քոչարյանի խափանման հարցը որոշելու։
