Զինծառայող

Որքա՞ն են բարձրացել զինծառայողների աշխատավարձերը Հայաստանում

368
(Թարմացված է 22:42 14.09.2019)
Աշխատավարձի ավելացումն առավել զգալի է ստորին օղակի զինվորականների՝ կրտսեր ենթասպաների և շարքային պայմանագրային զինծառայողների մոտ, բայց սպայական կազմին նույնպես չեն անտեսել։

ԵՐԵՎԱՆ, 14 սեպտեմբերի — Sputnik. Հասարակության շրջանում հաճախ է քննարկվում կադրային սպաներին և պայմանագրային զինծառայողներին պատշաճ աշխատավարձ տալու հարցը։ Sputnik Արմենիան դեռ երկու ամիս առաջ հարցում էր ուղարկել Հայաստանի պաշտպանության նախարարություն՝ խնդրելով տվյալներ ներկայացնել զինծառայողների աշխատավարձի աճի մասին, որի մասին որոշումը կառավարությունն ընդունել էր 2019թ-ի մայիսին։

ՊՆ-ն վերջապես պատասխանել է մեր հարցմանը և ներկայացրել հետևյալ տվյալները․

ՀՀ պայմանագրային զինծառայողների՝ ըստ կատեգորիաների, դրամական ապահովության հիմնական չափի վերաբերյալ միջին ամսական հաշվարկային չափերի աճը 2019թ-ի հուլիս ամսվա դրությամբ․

Բարձրագույն սպայական կազմ՝ 5%,

Ավագ սպայական կազմ՝ 8%,

Կրտսեր սպայական կազմ՝ 13%,

Ավագ ենթասպայական կազմ՝ 15%,

Պայմանագրային ծառայության կրտսեր ենթասպայական և շարքային կազմ՝ 18%։

«Դրամական ապահովության միջին ամսական հաշվարկային չափերում ներառված են դրամական ապահովությունը, ամսական լրավճարը, ծառայության հատուկ պայմանների համար հավելումները և պարգևավճարը», - նշված է ՊՆ–ի պատասխանում։

ՀՀ վարչապետ Նիկոլ Փաշինյանն ավելի վաղ հրապարակել էր կառավարության որոշման արդյունքում հունիսի 1-ից Հայոց բանակի զինծառայողների ամսական աշխատավարձերի բարձրացման ցուցանիշները։

Հրապարակման մեջ նշվում էր, որ գնդի հրամանատարի աշխատավարձը ավելացել է 23 հազար, գնդի հրամանատարի տեղակալինը`20 հազար, գումարտակի հրամանատարինը` 85 հազար, վաշտի հրամանատարինը` 96 հազար, դասակի հրամանատարինը` 72 հազար, ավագ ենթասպայինը`38 հազար դրամ, շարքային պայմանագրայիններինը` 30 հազար դրամով:

Հիշեցնենք`զինծառայողների աշխատավարձերի բարձրացման որոշումն ընդունվել էր մայիսի 23-ին ՀՀ կառավարության նիստում։

ՀՀ պաշտպանության նախարար Դավիթ Տոնոյանի ներկայացրած նախագծով հստակեցվում էր զինվորական ծառայության առանձնահատուկ պայմանների համար սահմանված հավելումների չափերը, առանձնահատուկ պայմանների անվանումները ու այդ պայմաններում ծառայության իրականացման չափանիշները։

Տոնոյանը հայտնել էր, որ զինծառայողների աշխատավարձերը բարձրանում են միջինը 10 տոկոսով, բայց կրտսեր կազմինը ու հատուկ պայմաններում ծառայություն իրականացնող զինծառայողներինը` մինչև 20 տոկոսով։

368
թեգերը:
աշխատավարձ, զինծառայող, Հայաստան
Ըստ թեմայի
Ի՞նչ է ուտելու զինվորը հայկական բանակում. McDonald's–ի մեթոդն են կիրառելու. լուսանկարներ
Զինվորներն ուտելուց հետո «սրտիկել» են ափսեն. Փաշինյանը լուսանկար է հրապարակել
Մարտական հերթապահության պայմանները կբարելավվեն. վարչապետ
Վարչապետ Փաշինյանը տեսանյութ է հրապարակել. զինվորներն ընթրում են նոր սննդակարգով
Բարձրորակ սնունդն արդեն հազարավոր զինվորների է հասանելի. Փաշինյան