ԵՐԵՎԱՆ, 4 սեպտեմբերի — Sputnik. Տարիների ընթացքում փրկարարների վարկանիշը գնալով բարձրացել է, ինչը նրանց կատարած աշխատանքի ամենակարևոր արձագանքն է։ Այս մասին այսօր իր խոսքում ասաց ՀՀ վարչապետ Նիկոլ Փաշինյանը, որը մասնակցում է ԱԻՆ աշխատողի օրվան նվիրված միջոցառմանը։
«Կարող ենք առանց չափազանցության արձանագրել, որ այս տարի փրկարարները, հրշեջներն իրենց անձնուրաց աշխատանքով կառավարել են այնպիսի ռիսկեր, որոնք կարող էին մեր երկիրն ու ժողովրդին կանգնեցնել բավականին լուրջ աղետների առաջ»,–ասաց վարչապետը։
Նրա խոսքով` նոր ժամանակներում, կապված կլիմայական փոփոխություններից, մենք արտակարգ իրավիճակների նոր մարտահրավերների առաջ ենք կանգնում։ Ըստ նրա` արտակարգ իրավիճակներն արդյունավետ կառավարելու հարցը միշտ պետք է կառավարության օրակարգում լինի։ Բացի այդ, Փաշինյանը նշեց նաև, որ պետք է առանձնահատուկ ուշադրություն դարձնել ԱԻՆ–ի տեխնիկական հագեցվածության ու ԱԻՆ աշխատակիցների սոցիալական պաշտպանվածության և երաշխիքների խնդրին։
«Սակայն կա կարևոր մեկ բան էլ` արտակարգ իրավիճակների մասին քաղաքացիների իրազեկվածության աստիճանի բարձրացումը։ Քաղաքացին պետք է մինչև վերջ գիտակցի, որ իր` առաջին հայացքից անմեղ թվացող պահվածքն ինչպիսի ծանր հետևանքներ կարող է ունենալ։ Արտակարգ իրավիճակներ չառաջացնելուն ուղղված կանխարգելման աշխատանքներն ավելի արդյունավետ ու կարևոր են»,–ասաց նա։
Ու թող այրվի ամենը կապույտ բոցերի մեջ, թե՞ մեզ պետք են դեռ փրկարար ու հրշեջ. խնդիրներ` ծխի ներքո
Նշենք, որ միջոցառման ժամանակ վարչապետի հրամանով մի շարք ԱԻՆ–ի աշխատակիցներ պարգևատրվեցին։ ԱԱԾ տնօրեն Արթուր Վանեցյանի հրամանով էլ արտակարգ իրավիճակների նախարար Ֆելիքս Ցոլակյանը պարգևատրվեց «Մարտական համագործակցության համար» մեդալով։ Իսկ ոստիկանության պետ Վալերի Օսիպյանի հրամանով` Ցոլակյանը պարգևատրվեց «Մարտական զորակցություն» մեդալով։
