Ինչի՞ մասին է նախկինների օրոք կազմված գաղտնի փաստաթուղթը. Փաշինյանը փակագծեր է բացում
(Թարմացված է 16:28 04.08.2019)
Մեր երկիրը գտնվում է ինստիտուցիոնալ կաթվածահար վիճակում, և մեր պետությունը ինստիտուցիոնալ առումով ամբողջովին ձախողված է:ԵՐԵՎԱՆ, 4 օգոստոսի — Sputnik. ՀՀ վարչապետ Նիկոլ Փաշինյանը Facebook-յան ուղիղ եթերում քիչ առաջ ամփոփեց արձակուրդը՝ նշելով, որ այդ ընթացքում ոչ միայն հասցրել է կարդալ վաղուց ծրագրված մի քանի գրքեր, այլև վերընթերցել է 2014թ.-ին՝ Սերժ Սարգսյանի իշխանության օրոք կազմված գաղտնի փաստաթուղթը, որին առաջին անգամ ծանոթացել էր մի քանի ամիս առաջ, սակայն որոշել էր հրատապ հետևություններ չանել և ուսումնասիրել արձակուրդի ժամանակ: Փաշինյանը նշում է, որ փաստաթուղթն այնքան գաղտնի է, որ անգամ ճիշտ չի համարում նշել դրա անունը:
©
Sputnik / Asatur Yesayants
«Փաստաթուղթը կարևոր է նրանով, որ մեզ տալիս է ամբողջական պատկերացում, թե ինչ վիճակում է մեր երկիրը կամ ինչ վիճակում է եղել, որովհետև այն պրոբլեմները, որոնք գրված են, բնականաբար, մեկ տարվա ընթացքում հնարավոր չէր շտկել: Այս փաստաթղթով կարող ենք արձանագրել, թե մենք ինչ իրավիճակում ենք ժառանգել ՀՀ-ը»,- ասաց Փաշինյանը: Ըստ նրա՝ փաստաթուղթը ընթերցելուց հետ եզրակացությունը հետևյալն է, որ հեղափոխության ժամանակաշրջանում, դրանից առաջ և ինչ-որ առումով նաև հետո մեր երկիրը գտնվում է ինստիտուցիոնալ կաթվածահար վիճակում, և մեր պետությունը ինստիտուցիոնալ առումով ամբողջովին ձախողված է:
«Սա գրվել է Սերժ Սարգսյանի իշխանության վերջին տարիներին, այս փաստաթղթի հեղինակները համարձակություն են ցուցաբերել այսպիսի գնահատական տալու»,- ասում է վարչապետն ու հավելում, որ գաղտնի փաստաթղթի բովանդակությանը ծանոթանալն օգնում է ավելի լավ հասկանալ, թե ինչ է կատարվում մեր երկրում և ինչ խնդիրներ պիտի լուծենք:
Նիկոլ Փաշինյանի ու նախարարի երկխոսությունը կամ պետական ո՞ր ծրագիրը կոռուպցիոն ռիսկ չունի
Ըստ նրա` մեր երկրում առկա ինստիտուցիոնալ խնդիրներից ամենաթարմ օրինակը ճանապարհաշինությունն է: Այս տարի աննախադեպ մեծ գումար է հատկացվել ճանապարհաշինության համար, թվում է, թե դրանց կառուցումը պիտի իրականացվի որակով, ժամանակին ու պատշաճ, բայց միշտ չէ, որ այդպես է լինում:
©
Sputnik / Aram Nersesyan
«Հայաստանում կառավարման համակարգը հենված է եղել կոռուպցիայի վրա, երբ կոռուպցիան հանում ես, պարզվում է՝ կառավարման համակարգ էլ չկա: Մենք պետք է 0-ից Հայաստանում ստեղծենք ինստիտուտներ»,- Փաշինյանը մանրամասնում է, որ խոսքը վերաբերում է ընդհուպ անկախ դատական համակարգ, պետական գնումների համակարգ ստեղծելուն: Ըստ նրա, երկրում կան ինստիտուտներ, որոնք առաջին հայացքից թվում է, թե լիարժեք կայացած ու գործունակ են, բայց երբ խորությամբ ուսումնասիրում ես, հասկանում ես, որ «դեկորատիվ կեղևի տակ գործ ունենք ինստիտուցիոնալ կաթվածի կամ կիսակաթվածի հետ»:
Փաշինյանի խոսքով` հաջողության հասնելու համար պետք են ամուր նյարդեր, անհրաժեշտ է սահմանել հստակ ռազմավարական առաջնահերթություններ և տուրք չտալ հույզերին,`խնդիրներին հերթով լուծում տալ:
Կոռուպցիա ասելով նկատի չունենք միայն նախկինը. Փաշինյանն ասել է` ինչպես պայքարել դրա դեմ
Վճռորոշ ռազմավարական քայլեր արդեն արվում են, օրինակ, օլիգարխիական տնտեսությունից անցում է արվում ներառական տնտեսության:
«Նախկինում սահմանափակ թվով մարդիկ իրենց տնտեսական հաջողության համար սահմանափակում էին մյուսների տնտեսական գործունեությունը: Մինչդեռ համախառն ներքին արդյունքի ձևավորմանը պիտի հնարավորինս շատ մարդ մասնակցի»,- ասում է վարչապետը: Նրա խոսքով`գաղափարի գագաթնակետն այն է, որ պետք է ձևավորվի տնտեսական համակարգ, որտեղ աղքատները աշխատանքով հարուստ դառնալու հնարավորություն ունենան:
Հիշեցնենք, որ ՀՀ վարչապետ Նիկոլ Փաշինյանն արձակուրդում է եղել հուլիսի 22–ից օգոստոսի 2–ը։
թեգերը:
Առաջիկա ժամերին ՀՀ նախագահն իր որոշման մասին կհայտնի․ Վանեցյան
(Թարմացված է 12:48 03.03.2021)
ՀՀ նախագահի հետ հանդիպմանը մասնակցում էին «Հայրենիք» կուսակցության նախագահ Արթուր Վանեցյանը, ՀՅԴ անդամ Արծվիկ Մինասյանը, ՀՀԿ-ական Վահրամ Բաղդասարյանը և Հայրենիքի փրկության շարժման վարչապետի միասնական թեկնածու Վազգեն Մանուկյանը։ԵՐԵՎԱՆ, 3 մարտի – Sputnik. Ավարտվեց «Հայրենիքի փրկության շարժման» անդամների հանդիպումը ՀՀ նախագահ Արմեն Սարգսյանի հետ։ «Հայրենիք» կուսակցության ղեկավար Արթուր Վանեցյանը հանդիպումից հետո լրագրողներին հայտնեց, թե ինչ է խոստացել ՀՀ նախագահը։
«Նախագահի հետ հանդիպման ժամանակ քննարկվել են հարցեր, որոնք կապված են Զինված ուժերի ԳՇ պետի ազատման դիմումը Սահմանադրական դատարան ուղարկել-չուղարկելու հետ։ Նախագահը լսեց մեր հարցերը, տեսակետները, նշեց, որ առաջիկա ժամերին իր որոշման մասին կհայտնի»,-ասաց Վանեցյանը։
Հավելենք, որ նախագահի հետ հանդիպմանը մասնակցում էին «Հայրենիք» կուսակցության նախագահ Արթուր Վանեցյանը, ՀՅԴ անդամ Արծվիկ Մինասյանը, ՀՀԿ-ական Վահրամ Բաղդասարյանը և Հայրենիքի փրկության շարժման վարչապետի միասնական թեկնածու Վազգեն Մանուկյանը։
©
Photo : official site of the MoD of RA
ՀՀ նախագահի մամուլի ծառայությունը երեկ հայտնեց, որ Արմեն Սարգսյանը որոշել է չստորագրել ՀՀ վարչապետ Նիկոլ Փաշինյանի` ԶՈւ ԳՇ պետ Օնիկ Գասպարյանին պաշտոնից ազատելու հրամանագրի նախագիծը, միաժամանակ առաջնորդվելով Սահմանադրության 169-րդ հոդվածի 1-ին մասի 4-րդ կետով` ՀՀ նախագահն առանձին դիմումով դիմելու է ՍԴ` «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի՝ Սահմանադրությանը համապատասխանելու հարցը որոշելու խնդրանքով։
Ավելի վաղ «Մեկ Հայաստան» կուսակցության նախագահ, Հայրենիքի փրկության շարժման ներկայացուցիչ Արթուր Ղազինյանը գրել էր, որ Արմեն Սարգսյանն ու Նիկոլ Փաշինյանը երեկ եկել են համաձայնության՝ իրավական աճպարարության միջոցով իրագործելու Նիկոլ Փաշինյանի` Օնիկ Գասպարյանին զբաղեցրած պաշտոնից ազատելու ցանկությունը։ Մասնավորապես, ըստ հաստատված ծրագրի, Արմեն Սարգսյանը կդիմի ՍԴ, բայց ոչ թե վարչապետի առաջարկության սահմանադրականությունը ստուգելու, այլ 2018թ-ի հունիսի 11-ին ընդունված «Զինվորական ծառայության և զինծառայողի կարգավիճակի մասին» ՀՀ օրենքում կատարված փոփոխությունների սահմանադրականությունը վիճարկելու պահանջով։
Ղազինյանի խոսքով` նման սխեմա կիրառվել է նաև 2018թ-ին Մովսես Հակոբյանին զբաղեցրած պաշտոնից ազատելու համար։ ՀՀ ԱԺ նշված օրենքում կատարվել է լրացում, համաձայն որի` բարձրագույն հրամանատարական կազմի` զինվորական պաշտոնից ազատումը կարող է իրականացվել` անկախ այն հանգամանքից՝ առկա են սույն հոդվածի 1-ին մասում սահմանված հիմքեր, թե ոչ։
Նրա խոսքով` սա նշանակում է, որ Օնիկ Գասպարյանին զբաղեցրած պաշտոնից ազատելու ՀՀ վարչապետի որոշումը կմտնի օրինական ուժի մեջ, և Օնիկ Գասպարյանը իրավաբանորեն կդադարի լինել ՀՀ ԶՈւ Գլխավոր շտաբի պետ։
Հիշեցնենք` Հայաստանի ներքաղաքական իրադրությունը սրվեց, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը` ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ հեղափոխությունը պաշտպանելու համար։
Նա հայտնեց նաև, որ ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը առաջարկությունը կրկին ուղարկեց ՀՀ նախագահին։
թեգերը:
ԲԴԽ նախագահ Ռուբեն Վարդազարյանը հրաժարականի մտադրություն չունի
(Թարմացված է 12:47 03.03.2021)
ԲԴԽ նախագահը լրագրողների հետ ճեպազրույցում անդրադարձավ նաև Արթուր Վանեցյանի, Գագիկ Ջհանգիրյանի ու Գագիկ Հարությունյանի մասին հարցերին: ԵՐԵՎԱՆ, 3 մարտի - Sputnik. Բարձրագույն դատական խորհրդի նախագահ Ռուբեն Վարդազարյանն այսօր ԱԺ-ում տեղի ունեցած բանավեճերից հետո հրաժարական տալու մտադրություն չունի: Նա այդ մասին լրագրողներին հայտնեց ԱԺ նիստի ընդմիջմանը։
Հարցին, թե ինչպես է գնահատում իր նկատմամբ իշխող քաղաքական ուժի պատգամավորների վերաբերմունքը, ԲԴԽ նախագահը պատասխանեց. «Առնվազն ագրեսիվ: Պատճառը չգիտեմ»:
Խոսելով 2020թ-ի նոյեմբերի 15-ին դատական համակարգի անաչառության մասին իր տարածած հայտարարությունից հետո ԱԱԽ նախկին տնօրեն Արթուր Վանեցյանի կալանքի որոշումը դատարանի կողմից ոչ իրավաչափ ճանաչելու որոշման մասին՝ Վարդազարյանը նշեց, որ որևէ մեկը, այդ թվում՝ ինքը, իրավունք չունի դատարանի կայացրած որոշմանը գնահատական տալու:
Պատասխանելով ՀՀ նախկին դատախազ Գագիկ Ջհանգիրյանին ԲԴԽ անդամ նշանակելու՝ իշխանության առաջարկի մասին հարցերին՝ Վարդազարյանն ասաց, որ ինքը բազմիցս հայտարարել է, որ իր կարծիքով` կենսաթոշակային տարիքը լրանալուց հետո ԱԺ-ն իրավասու չէր Ջհանգիրյանին ընտրել ԲԴԽ անդամ:
«Ես այդ հայտարարությունն արել եմ, երբ պարոն Ջհանգիրյանի մասին դեռ լուրերի մակարդակով էր խոսվում, և նա պաշտոնապես թեկնածու չէր: Երբ պարոն Ջհանգիրյանը պաշտոնապես դարձավ թեկնածու, այդ պահից սկսած` ես պարոն Ջհանգիրյանի վերաբերյալ որևէ արտահայտություն չեմ արել և դրսևորել եմ այն զսպվածությունը, որը պարտադրված է օրենքով»,- ասաց նա:
Նույն տարիքային խնդիրը, ըստ նրա, եղել է նաև Գագիկ Հարությունյանի պաշտոնավարման հետ կապված, ու անգամ այդ հարցով հայց է եղել դատարանում: Բայց Հարությունյանի պաշտոնանկությունից հետո հայցվորը հրաժարվել է իր հայցից:
Խորհրդարանը ՀՀ Վճռաբեկ դատարանի նոր նախագահ ընտրեց
Հիշեցնենք՝ ԲԴԽ նախագահ Ռուբեն Վարդազարյանն այսօր խորհրդարանում ներկայացնելու է Վճռաբեկ դատարանի դատավորների թեկնածուներին:
Բայց մինչ պատգամավորները կսկսեին հարցեր տալ թեկնածուներին, նրանք օգտվելով առիթից` սկսեցին իրենց հետաքրքրող հարցերի պատասխանները պահանջել Վարդազարյանից: Հարցուպատասխանն անցավ շատ թեժ մթնոլորտում։
Նշենք, որ Բարձրագույն դատական խորհուրդը Վճռաբեկ դատարանի քաղաքացիական և վարչական պալատի դատավորի թափուր տեղի համար առաջադրել է Սամվել Գրիգորյանի, Արմեն Հայկյանցի և Արսեն Մկրտչյանի թեկնածությունները, որոնք նախատեսվում է քննարկել ընթացող քառօրյա նիստերի օրակարգում:
Սամվել Գրիգորյանը, սակայն, երեկ ինքնաբացարկ էր հայտնել, ինչի հետևանքով հարցի քննարկումը մեկ օրով հետաձգվել էր:
թեգերը: