ԵՐԵՎԱՆ, 4 հուլիսի — Sputnik. Եթե համապատասխան ուսումնասիրությունից հետո, պարզվի, որ Սևանի ցանցային ձկանբուծական ընկերության գործունեությունը նպաստում է լճի հատակի ֆոսֆորային նստվածքի կուտակմանը, ինչն էլ իր հերթին նպաստում է լճի ջրի ծաղկմանը, ընկերության գործունեույունը կարգելվի։
Այս մասին այսօր, կառավարության նիստից հետո լրագրողների հետ զրույցում ասաց ՀՀ շրջակա միջավայրի նախարար Էրիկ Գրիգորյանը` հավելելով. «իհարկե, առանց մի վայրկյան անգամ մտածելու»։
«Ես նաև իմ սուբյեկտիվ կարծիքն եմ ասել, որ ցանցավանդակային տնտեսությունները ջրային տարածքների համար նպատակահարմար չեմ համարում»,– ասաց նախարարը։
Սևանա լճում ջրի ծաղկմանը նպաստում են նաև դեպի լիճ հոսող ափամերձ ռեստորանների ու կոմունալ–կենցաղային մեծ քանակի կեղտաջրերը, ջրածածկ տարածքների ժամանակին չմաքրվելը։ Կառավարությունն արդեն հաշվարկել է, թե որքան ափամերձ տարածքներ պետք է մաքրվեն։
«Պարզ օրինակ` 10-15 տարի առաջ լվացքի մեքենաներ այդքան շատ չէին օգտագործվում, իսկ հիմա մեծ քանակությամբ լրացուցիչ քիմիական նյութեր են լցվում։ Բացի դրանից ջերմաստիճանը, որովհետև հունիսն արդեն աշխարհում հայտարարվեց ամենաբարձր ջերմաստիճանով ամիսը։ Մայիսին Սևանում տեղւմների քանակը շատ քիչ էր` 36 մլն խմ չափ, երբ պատմական նվազագույնը 33 է եղել։ Նաև քամիների պատճառով մեծ ծավալի գոլորշիացում է տեղի ունեցել»,– ասաց նախարարը։
Գրիգորյան. «Լճում տեղադրված ցանցավանդակները ևս նպաստում են Սևանում ջրիմուռների բազմացմանը»
Նրա խոսքով, ջրի աղտոտման հիմնական գործոններից են նաև կեղտաջրերը։ «Գեղարքունիքի մարզի բոլոր բնակավայրերի կեղտաջրերը լցվում են լիճը»,– ասաց նախարարը` նշելով, որ մարզում մաքրման կայաններ չեն գործում։
Այդուհանդերձ, Էրիկ Գրիգորյանը հավաստիացրեց, որ մասնագետների գնահատմամբ առաջիկա 7-10 օրվա ընթացքում լճում առաջացած կանաչ զանգվածը կքայքայվի ու կվերանա։
Հիշեցնենք, 2018թ–ի ամռանը Սևանա լճում կապտականաչավուն ջրիմուռների քանակի ավելացման պատճառով լճի գույնը կանաչ էր դարձել։ Սակայն ի տարբերություն այս տարվա, անցյալ տարի այդ գործընթացը սկսվել էր հուլիսի երկրորդ կեսին։
Այդ ժամանակ, ցույց տալու համար, որ Սևանի ջուրն անվտանգ ու մաքուր է, «Սևան» ազգային պարկի տնօրեն Վահե Գուլանյանը հրապարակավ խմել էր դրանից։ Նրա օրինակի հետևել էին նաև ֆլեշմոբի այլ մասնակիցներ։
Հուլիսի 29-ին առողջապահության նախարարն ու Գեղարքունիքի մարզպետն էլ, վստահեցնելու համար, որ Սևանում լողալն անվտանգ է ֆեյսբուքյան ուղիղ եթերում մտել էին Սևանա լիճը` լողալու։
Սևանը ծաղկել է. շրջակա միջավայրի նախարարը հաստատում է լուրը և լուծում առաջարկում
Մինչ այդ, սակայն, օրեր առաջ առողջապահության նախարարությունը քաղաքացիներին հորդորել էր զերծ մնալ ծաղկած ջրերում լողալուց:
Այս տարի ջրիծաղկման ու դրանում կապտականաչավուն ջրիմուռների ավելացման մասին պաշտոնական որևէ հայտարարույուն առայժմ չի արվել։
