ԵՐԵՎԱՆ, 17 հունիսի — Sputnik. Հայաստանում խաղատների հանդեպ վերահսկողությունը կխստանա։ Դրա վերաբերյալ առաջարկները ներկայացված են «Գովազդի մասին» օրենքի փոփոխությունների նախագծում, որն այսօր քննարկվում է Ազգային ժողովում։
Մասնավորապես, խաղատների գովազդում (ինչպես սովորական, այնպես էլ օնլայն) ցանկանում են սահմանափակել ոչ միայն ժամանակն ու տեղը, այլ նաև գովազդի բովանդակությունը։ Գովազդային հոլովակներում չի կարելի տպավորություն ստեղծել, թե խաղին մասնակցելն ապահովում է պարբերաբար եկամուտ (շահույթ) ստանալու հնարավորությունը կամ աշխատանքի այլընտրանք է։
Չի կարելի ներշնչել, որ խաղի միջոցով հնարավոր է հասնել հասարակական, մասնագիտական, սպորտային հաջողության։
Ըստ առաջարկների` յուրաքանչյուր հեռուստահաղորդակցության ալիքով հեռարձակվող յուրաքանչյուր վիճակախաղի գովազդը թույլատրվում է ժամը 22:00-ից մինչև 07:00-ն ընկած ժամանակահատվածում, իսկ ռադիոյով՝ ժամը 08:00-ից մինչև 20:00-ն ընկած ժամանակահատվածում, բացառությամբ՝ մանկապատանեկան հաղորդումներին նախորդող և հաջորդող մեկ ժամվա ընթացքում: Այդ ժամանակահատվածում գովազդի ընդհանուր տևողությունը, այդ թվում` գովազդային հաղորդումները և գովազդային տեղեկությունները վիճակախաղի կամ վիճակախաղի կազմակերպչի մասին, չեն կարող գերազանցել 3 րոպեն, որը մեկ ժամվա ընթացքում կարող է հեռարձակվել երկու անգամից ոչ ավելի, և ընդհանուր տևողությունը չի կարող գերազանցել 60 վայրկյանը:
Վիճակախաղի, շահումով խաղի, ինտերնետ շահումով խաղի, խաղատների կամ խաղարկությունով կամ համակցված վիճակախաղի շահումային ֆոնդի խաղարկության գովազդը պետք է պարտադիր պարունակի նախազգուշացում՝ հետևյալ բովանդակությամբ. «Նախազգուշացում՝ խաղին մասնակցությունը նյութական վնասներ կրելու ռիսկ է պարունակում» կամ «Նախազգուշացում՝ խաղին մասնակցելու հետևանքով Դուք կարող եք կրել նյութական վնասներ»։
Ընդ որում` նշված նախազգուշացումը պետք է լինի ոչ պակաս շեշտադրված, քան գովազդում առկա մյուս տեղեկությունը:
Այդ կանոնները խախտելու համար առաջարկվում է տուգանել նվազագույն աշխատավարձի 1000-ապատիկի չափով։
