ԵՐԵՎԱՆ, 16 հունիսի — Sputnik, Արմենուհի Մխոյան. Եվրոպական միությունն առաջիկայում 13 մլն եվրո արժողությամբ նոր ծրագիր է իրականացնելու Հայաստանում` Շիրակի, Լոռու և Տավուշի մարզերում: ՀՀ կառավարությունն արդեն հաստատել է այս ծրագիրը: Այս մասին այսօր Աշոցքում լրագրողների հետ ունեցած ճեպազրույցի ժամանակ ասաց Հայաստանում Եվրամիության դեսպան Պյոտր Սվիտալսկին: «Հուսով եմ, որ այս տարվա հոկտեմբեր-նոյեմբեր ամիսներին արդեն կկարողանանք սկսել այդ ծրագիրը, որը միտված է զբոսաշրջության խթանմանը»,- նշեց դեսպանը։
Եվրամիությունը ՀՀ կառավարության հետ քննարկում է նաև տեղական համայնքների աջակցության ծրագիր: Այն լինելու է ՀՀ -ԵՄ 2019 թվականի գործողությունների ծրագրում: «Այս ծրագրի մանրամասները դեռ չեմ կարող բացահայտել, քանի որ ՀՀ կառավարության հետ դեռ քննարկումների փուլում ենք, բայց ուզում ենք գումարն ուղղորդել համայնքներին՝ գյուղերին և քաղաքներին»:
Անդրադառնալով Հայաստանին դատաիրավական համակարգի բարեփոխման նպատակով հավելյալ 25 մլն եվրո տրամադրելու փաստին՝ դեսպանը նշեց. «Այո՛, Հայաստանը ստացել է 25 մլն եվրո: Դա քաղաքական որոշում է, որովհետև արտացոլում է Հայաստանում տեղի ունեցած ժողովրդավարական փոփոխությունների՝ Եվրամիության կողմից դրական գնահատականը: Այժմ ձեր կառավարության հետ քննարկում ենք, թե ուր ուղղորդել այդ գումարը, և դա պետք է շատ արագ որոշենք, քանի որ դա հրատապ գումար է՝ արագ պետք այդ 25 մլն հատկացվի ինչ- որ նպատակների: Սպասում ենք, որ կառավարությունը ներկայացնի համապարփակ և հստակ ծրագիր»:
Խոսելով Հայաստանի նոր կառավարության հետ համագործակցության մասին` դեսպանը վստահեցրեց, որ այս կառավարության հետ ունեն գերազանց հարաբերություններ. «Մենք բավարարված ենք, թե ՀՀ կառավարությունն ինչպես է առաջ շարժվում մեր միասնական օրակարգով»:
Հավելենք, որ հունիսի 16-ին Հայաստանում Եվրոպական միության պատվիրակությունը՝ դեսպան Պյոտր Սվիտալսկու գլխավորությամբ, Էյ ԹԻ Փի բարեգործական հիմնադրամի հետ համատեղ Աշոցքում՝ դահուկայի սպորտի կենտրոնում, հիմնեց ծառերի Եվրոպական պուրակ:
