ԵՐԵՎԱՆ, 15 հունիսի- Sputnik. Ազգային ժողովի ԲՀԿ խմբակցության ղեկավար Գագիկ Ծառուկյանը երկրորդ անգամ է հրավիրվել հարցաքննության: Այս մասին Sputnik Արմենիայի թղթակցի հետ զրույցում տեղեկացրեց ՀՀ Քննչական կոմիտեի տեղեկատվության և հասարակայնության հետ կապերի բաժնի պետ Նաիրա Հարությունյանը։
«Հարցաքննության հրավիրելու վերաբերյալ համապատասխան գրությունն արդեն ուղարկվել է Ազգային ժողով»,– ասաց նա:
Հիշեցնենք, որ ավելի վաղ Ծառուկյանը չէր ներկայացել Քննչական կոմիտեի հարցաքննությանը, ավելին` ծանուցումն առձեռն ստանալուց հետո նա պատռել էր թուղթը:
Ծառուկյանը հարցաքննության է հրավիրվում Աբովյան քաղաքում «Քաղաքացիական պայմանագիր» կուսակցության թեկնածուի ենթաշտաբներից մեկի պետի մեքենան հրկիզելու փաստի առթիվ հարուցված քրեական գործի նախաքննության շրջանակում: Քննչական կոմիտեի Կոտայքի մարզային քննչական վարչության Աբովյանի քննչական բաժնում քննություն է տարվում` պարզելու ուրիշի գույքը դիտավորյալ ոչնչացնելու կամ վնասելու դեպքի հանգամանքները:
2019 թվականի հունիսի 8-ին, ժամը 04-ի սահմանում անհայտ անձը հրկիզել է Աբովյան քաղաքի 46-ամյա բնակչին պատկանող բնակարանի դուռն ու «Նիսան Տիդա» մակնիշի ավտոմեքենան: Դեպքի առթիվ հարուցվել է քրեական գործ՝ քրեական օրենսգրքի 185-րդ հոդվածի 2-րդ մասի 1-ին կետով (Գույքը դիտավորությամբ ոչնչացնելը կամ վնասելը): 46-ամյա բնակիչը ճանաչվել է տուժող:
