ԵՐԵՎԱՆ, 7 հունիսի — Sputnik. Եթե մենք ուզում ենք ունենալ որակյալ աշխատանք, ապա պետք է ապահովենք արժանապատիվ եկամուտ։ Այսօր ԱԺ–ում, պատասխանելով ՊԵԿ աշխատակիցների աշխատավարձերի ու պարգևատրումների մասին պատգամավորների հարցերին, ասաց ՀՀ ՊԵԿ նախագահ Դավիթ Անանյանը։
Նա նաև նշեց, որ ՊԵԿ–ում կա պարգևատրումների հաշվարկի հստակ համակարգ, որը վերահսկում է անձամբ ինքը։
«ՊԵԿ–ում ամենամսյա պարգևատրումները տրվում են նոր ներմուծված մեթոդոլոգիայով` կատարողականի ցուցանիշների հիման վրա։ Կատարողականները երկու խումբ գործակիցներ են`մարդկային դիմանկարը նկարագրող ցուցանիշների 30 տոկոսին գումարվում է պրոֆեսիոնալ գործունեության ցուցանիշների 70 տոկոսը և 0.3-1.3 տոկոս գործակիցների շրջանակում յուրաքանչյուր անձ ամեն ամիս գնահատվում է։ Իսկ այդ յուրաքանչյուր անձի պարգևատրումը հաշվարկում եմ անձամբ ես»,– ասաց Անանյանը։
ՊԵԿ նախագահը վստահ է, որ իրեն ներկայացվող ցուցանիշները չեն կարող սխալ լինել։
«Որովհետև բաժնի պետը ներկայացնում է իր դատողությունները, վարչության պետը` իր տեսանկյունը, վարչության պետից հետո կա ոլորտը կարգավորող տեղակալը, վերջում գալիս է ՊԵԿ նախագահը»,– ասաց նա։
Հիշեցնենք` 2018թ–ի վերջին մամուլում տեղեկություններ հայտնվեցին, որ ՊԵԿ ղեկավարությունը և աշխատակիցները 8-9 մլն դրամի պարգևատրումներ են ստացել։
Խնդիրը օրինականության դաշտ բերելու և ՊԵԿ ոլորտում աշխատավարձերը բարձրացնելու համար 2019թ–ի ապրիլի 4-ին ՀՀ կառավարությունը որոշում կայացրեց ընթացիկ տարվա պարգևատրումների ֆոնդը ևս լրացուցիչ 2.3 միլիարդ դրամով ավելացնելու մասին։ Նշենք, որ կառավարության նիստում այս հարցին դեմ արտահայտվեց ու դեմ քննարկեց ֆինանսների նախարար Ատոմ Ջանջուղազյանը։ Դեմ քվեարկող երկրորդ պաշտոնյան մշակույթի նախարար տեղակալ Տիգրան Գալստյանն էր։
