ԵՐԵՎԱՆ, 30 մայիսի — Sputnik. ՀՀ կառավարությունն առաջարկում է հունիսի 7-ին, ժամը 11:00-ին գումարել Ազգային ժողովի արտահերթ նիստ։ Այս մասին որոշումն ընդունվել է այսօր կառավարության նիստի ընթացքում։
Արտահերթ նիստի օրակարգում կառավարությունն առաջարկում է ընդգրկել Հարկային օրենսգրքում, «Պետական տուրքի մասին» օրենքում, «Ապահովագրության և ապահովագրական գործունեության մասին», «Լիցենզավորման մասին», «Կուտակային կենսաթոշակների մասին», «Ինքնազբաղված անձանց հարկային արտոնությունների մասին» օրենքներում փոփոխությունների ու լրացումների նախագծերը։
Նիստի օրակարգում են ներառված նաև սահմանամերձ բնակավայրերում գործունեությունը հարկերից ազատելու, կազմակերպությունների և անհատ ձեռնարկատերերի կողմից ներմուծվող` ակցիզային հարկով հարկման ոչ ենթակա ապրանքների ցանկը հաստատելու և ավելացված արժեքի հարկից ազատելու մասին օրենքների նախագծերը, ինչպես նաև պետական կենսաթոշակների, ժամանակավոր անաշխատունակության և մայրության նպաստների, նպաստների մասին օրենքներում լրացումների ու փոփոխությունների նախագծերը։
Ներկայացված նախագծերն ԱԺ–ում կներկայացնի արդարադատության նախարար Արտակ Զեյնալյանը:
Ընդ որում, նշված օրինագծերի երկրորդ ընթերցմամբ քննարկումը կառավարությունն առաջարկում է կազմակերպել առաջին ընթերցմամբ ընդունվելուց անմիջապես հետո` 24 ժամվա ընթացքում:
