ԵՐԵՎԱՆ, 29 մայիսի — Sputnik. Երևանի պետական համալսարանում վաղը` մայիսի 30-ին, բուհի հոգաբարձուների խորհրդի նիստ տեղի կունենա։ Sputnik Արմենիայի հետ զրույցում այս մասին հայտնեց ԵՊՀ մամուլի խոսնակ Գևորգ Էմին–Տերյանը։
«Նիստի ժամանակ կընդունվի բուհի ռեկտոր Արամ Սիմոնյանի հրաժարականն ու կնշանակվի ռեկտորի ժամանակավոր պաշտոնակատար»,– հայտնեց նա։
Նշենք, որ ԵՊՀ-ի կանոնադրության համաձայն` ռեկտոր կարող է ընտրվել այն պրոֆեսորը, որն ունի դոկտորի գիտական աստիճան: Նույն անձը չի կարող ավելի քան 2 անգամ անընդմեջ ընտրվել ռեկտորի պաշտոնում:
«Ռեկտորն ընտրվում է բաց մրցույթով՝ հոգաբարձուների խորհրդի նիստում, գաղտնի քվեարկությամբ, 5 տարի ժամկետով։ Ռեկտորի պաշտոնում ընտրված է համարվում այն թեկնածուն, որը խորհրդի ցուցակային կազմի 50 տոկոսից ավելի ձայն է հավաքել: Սա նշանակում է, որ խորհրդի 32 անդամներից առնվազն 17-ը պետք է քվեարկեն տվյալ թեկնածուի օգտին»,–նշված է մայր բուհի կանոնադրության մեջ։
Հիշեցնենք, որ մայիսի 23–ին ԵՊՀ ռեկտոր Արամ Սիմոնյանը հրաժարական տվեց։ Սիմոնյանն իր ելույթում հույս էր հայտնել, որ ռեկտորի ընտրությունները կլինեն բավականին շուտ, որովհետև դրանից է բխում է նաև համալսարանի բնականոն գործունեությունը։
Սիմոնյանը նշել էր, որ շարունակելու է մնալ համալսարանում և ղեկավարել Հայագիտական հետազոտությունների ինստիտուտը։
