ԵՐԵՎԱՆ, 27 մայիսի— Sputnik. Սփյուռքում ապրող հայերը ՀՀ վարչապետի տիկին, «Ժպիտների քաղաք» բարեգործական հիմնադրամի հոգաբարձուների խորհրդի նախագահ Աննա Հակոբյանի հետ հանդիպումների ժամանակ դեռ խոսում են Հայաստանում տեղի ունեցած փոփոխություններից։ Հակոբյանն այդ մասին ասաց այսօր լրագրողների հետ հանդիպմանը` պատասխանելով Sputnik Արմենիայի հարցին, թե հայ համայնքի ներկայացուցիչների հետ հանդիպումների ընթացքում ամենահաճախ բարձրաձայնվող խնդիրը կամ հարցը ո՞րն է եղել։
«Ես կարծում էի` սա ժամանակի ընթացքում կփոխվի, սակայն դեռ չի փոխվել, և մարդիկ ինձ հետ հանդիպման ժամանակ դեռ կիսում են իրենց ուրախությունը տեղի ունեցած փոփոխությունների հետ կապված։ Մարդիկ նաև շատ հաճախ ուզում են իրենց զայրույթը կիսել նախկինում տեղի ունեցած արատավոր երևույթների առնչությամբ, հատկապես`սփյուռքի այն շերտը, որ ներդրումներ են արել։ Նրանք դժգոհում են, որ երբեք չեն իմացել` ուր է գնում իրենց գումարը»,–ասաց նա։
Հակոբյանի խոսքով` սփյուռքում մեծ է այն մարդկանց թիվը, որոնք ժամանակին դադարեցրել են ներդրումներ անել, բայց հիմա ասում են, որ նորից կսկսեն համագործակցել Հայաստանի իշխանությունների հետ։
Ըստ նրա` չնայած սփյուռքի տարբեր շերտերի հետ է հանդիպում, սակայն բոլորի մտահոգությունն ու ապագայի հանդեպ հույսը նույնն է։ Հակոբյանը հավաստիացնում է, որ Հայաստանում տեղի ունեցածի հանդեպ սփյուռքում ապրող շատ հարուստ մարդն ունի նույն զգացմունքները, ինչ վատ ապրողը։ «Սփյուռքի մեր հայրենակիցներն ասում են նաև, թե ինչո՞վ կարող են հայրենիքին օգնել։ Սակայն շատ հաճախ ասում են նաև, որ արդեն վերադարձել են Հայաստան, տուն են գնել այստեղ»,–ասաց նա։
Հիշեցնենք` վարչապետ Նիկոլ Փաշինյանի կինը՝ Աննա Հակոբյանը, 2018թ.-ի ամռանն ազդարարեց բարեգործական՝ «City of smile» («Ժպիտների քաղաք») բարեգործական հիմնադրամ ստեղծելու մասին, որի հոգաբարձուների խորհրդի նախագահը հենց ինքն է։
