ԵՐԵՎԱՆ, 16 մայիսի – Sputnik. ՀՀ կենտրոնական բանկը մայիսի 16-ից շրջանառության մեջ է դրել «ԵՊՀ հիմնադրման 100-ամյակ» արծաթե հուշադրամը: Այս մասին հայտնում է ԿԲ մամուլի ծառայությունը։
Դիմերեսին հայ գիտնականներին նվիրված հուշասյան հատվածն է (գտնվում է Երևանի պետական համալսարանի սրահում, քանդակագործ` Վահան Ղազարյան, ճարտարապետ` Լևոն Բալայան, ճարտարագետ` Սոս Մանուկյան) և «SCIENTIA POTENTIA EST» մակագրությունը:
Դարձերեսին «Սահակ Պարթև և Մեսրոպ Մաշտոց» խմբաքանդակից հատվածն է (գտնվում է Երևանի պետական համալսարանի մուտքի մոտ, քանդակագործ` Արա Սարգսյան, ճարտարապետ` Ռոմեո Ջուլհակյան), ֆոնին` ԵՊՀ շենքի ուրվագծի և գերբի պատկերները:
Հուշադրամի անվանական արժեքը 1000 դրամ է, քաշը` 33,6 գ, տրամագիծը`40,0 մմ, տպաքանակը`500 հատ
Էսքիզների հեղինակներն են Հարություն Սամուելյանը (դիմերես) և Վարդան Վարդանյանը (դարձերես):
Հատվել է Լիտվայի դրամահատարանում:
