ԵՐԵՎԱՆ, 30 ապրիլի — Sputnik. Վայոց Ձորի փոխմարզպետ Ռազմիկ Տոնոյանը Facebook-ի իր էջում «Մի ծխախոտի «բիչոկի» պատմություն» վերնագրով գրառում է արել, որտեղ ներկայացրել է Քաղաքացու օրը տեղի ունեցած վիճաբանության հեռուն գնացող արմատները։
Նա տեղեկացրել է, որ 2019 թվականի ապրիլի 27-ին՝ Քաղաքացու օրվան նվիրված տոնակատարության ժամանակ վիճաբանությունը հրահրել են «Մավշին»ՍՊԸ-ի տնօրեն Մխիթար Մաթևոսյանը և նրա ընկեր Հրայր Բաբայանը,ով Զառիթափ խոշորացված համայնքի ղեկավար Սիմոն Բաբայանի հորեղբոր որդին է։
«2018թ.-ին մարզպետ Արագած Սաղաթելյանին հայտնում եմ, որ տեղեկություններ են հասել ,որ Վայք քաղաքի «Արևիկ» մարզադաշտի և զբոսայգու 2016թ շինվերանորոգման աշխատանքներում կան թերություններ։ Շինվերանորոգման աշխատանքների ընդհանուր գումարը կազմել է 120 մլն դրամ, որից «Արևիկ» մարզադաշտում՝ 60 մլն դրամ: Մարզպետը, որը նշանակվել էր «Բարգավաճ Հայաստան» կուսակցությունից, տեղեկացնում է, որ աշխատանքները կատարել է վերոնշյալ «Մավշին» ՍՊԸ-ն ՝տնօրեն Մխիթար Մաթևոսյան։ Հավելեմ, որ տվյալ ժամանակահատվածում Վայքի քաղաքապետ է եղել նույն ինքը՝ Արագած Սաղաթելյանը։ Չանցած 30 րոպե՝ նա իր աշխատասենյակում ինձ ծանոթացնում է Նշված ՍՊԸ-ի տնօրենի հետ։ Իրեն ասեցի ,որ շինվերանորոգման աշխատանքներում կան թերություններ։
Հավելեմ նաև, որ մարզադաշտի շինվերանորոգման աշխատանքներն այս պահին գտնվում են փորձաքննության փուլում։Վերոնշյալ «Մավշին» ՍՊԸ-ի տնօրեն Մխիթար Մաթևոսյանի հետ իմ առնչությունը եղել է այդքանը»,–գրել է փոխմարզպետը։
Հիշեցնենք, որ ապրիլի 27–ին Վայոց ձորի փոխմարզպետ Ռազմիկ Տոնոյանը հաղորդում էր ներկայացրել Ոստիկանության Եղեգնաձորի բաժին՝ տեղեկացնելով, որ Քաղաքացու օրվա առիթով կազմակերպված միջոցառման ընթացքում իր վրա հարձակվել, վիրավորել, հայհոյանքներ են հնչեցրել ԱԺ ԲՀԿ խմբակցության պատգամավոր Սերգեյ Բագրատյանն ու Արտաբույնք վարչական համայնքի ղեկավար Արմեն Սեդրակյանը:
Միջադեպի հետ կապված Sputnik Արմենիային պարզաբանում էր տվել նաև Եղեգիս խոշորացված համայնքի ղեկավար Արթուր Ստեփանյանը (Արտաբույնք վարչական համայնքը Եղեգիս համայնքի կազմում է)։ «Պարոն փոխմարզպետն իրեն մի քիչ լավ չի պահել երիտասարդների հանդեպ, այն էլ երեկվա գեղեցիկ օրով. երիտասարդներն աղջիկների հետ են եղել, ասել է՝ բիչոկը վերցրեք, առանձնազրույց են ունեցել, վիճաբանություն է եղել, այդ ժամանակ մեր հարգարժան պատգամավորն ասել է՝ դե վերջ տվեք, չի՛ կարելի»,–ասել է նա:
