ԵՐԵՎԱՆ, 27 ապրիլի — Sputnik. 2018թ–ի ապրիլի 27-ին նախատեսված էր Նիկոլ Փաշինյանի ու այն ժամանակ վարչապետի պաշտոնակատար Կարեն Կարապետյանի հանդիպումը։ Այս մասին այսօր ֆեյսբուքյան օգտատերերին հիշեցրել են ԱԺ փոխնախագահ Ալեն Սիմոնյանն ու առողջապահության նախարար Արսեն Թորոսյանը։ Նրանք արտասահմանյան երկրներից մեկի օդանավակայանից ուղիղ եթերում տեսաուղերձ են հղել ՀՀ քաղաքացիներին` Քաղաքացու օրվա կապակցությամբ ու միաժամանակ վերհիշել 1 տարի առաջ այս օրը տեղի ունեցած իրադարձությունները։
«1 տարի առաջ այս օրը պետք է տեղի ունենային բանակցությունները Նիկոլ Փաշինյանի ու Կարեն Կարապետյանի միջև, որոնք այդպես էլ տեղի չունեցան։ Թե ինչ եղավ հետո, դուք արդեն գիտեք», – ասաց Սիմոնյանը։ Արսեն Թորոսյանն էլ ավելացրեց. «Թե ինչ եղավ հետո, շատ հուզիչ էր»։
«Այսօր լինելով գործուղման մեջ, չէինք կարող չկիսել այն ուրախությունը, որ տիրում է ու թևածում է Հայաստանում։ Բոլորիդ շնորհավորում եմ առաջին անգամ տոնվող Քաղաքացու օրվա կապակցությամբ»,– ասաց Թորոսյանը` բարձր տրամադրություն ու նոր հաղթանակներ մաղթելով հայ ժողովրդին։
2019թ. մարտի 21-ին կառավարությունը հավանություն էր տվել «Տոների և հիշատակի օրերի մասին» օրենքում լրացում կատարելու մասին օրենքի նախագծին, որով առաջարկվում էր ապրիլի վերջին շաբաթ օրը հռչակել ՀՀ քաղաքացու օր։
Ապրիլի 9-ին ՀՀ խորհրդարանն ընդունեց կառավարության առաջարկած օրինագիծը։
Այս տարի Քաղաքացու օրը նշվում է ապրիլի 27-ին:
Օրվա տոնական միջոցառումների համար ՀՀ կառավարությունը պետական բյուջեից հատկացրել է 124 մլն դրամ։