ԵՐԵՎԱՆ, 23 ապրիլի — Sputnik. Երևանի ավագանու նիստն այսօր անցավ լարված մթնոլորտում։ «ԲՀԿ» և »Իմ քայլը» խմբակցությունների որոշ անդամներ անգամ հասան «տղայական ռազբորկաների» ։
ԲՀԿ խմբակցության անդամ Արմեն Ներսիսյանն իրեն երկար նայելու համար դուրս հրավիրեց «Իմ քայլը» խմբակցության անդամ Վազգեն Դարբինյանին:
«Զայրացա, որովհետև նկատեցի, որ շատ երկար է նայում։ Դուրս հրավիրեցի, որ հասկանայի` ինչու է այդքան երկար նայում»,– լրագրողների հարցերին ի պատասխան ասաց Արմեն Ներսիսյանը` հավելելով, որ դրանում որևէ վատ բան չկա, և որ դա «տղայական ռազբորկա» չէ։
Ավագանու անդամների խոսակցությանը միջամտեց նաև այսօրվա նիստին ներկա ԱԺ «Բարգավաճ Հայաստան» խմբակցության պատգամավոր Միքայել Մելքումյանը։ Նա կարծիք հայտնեց, որ լարված իրավիճակ է ստեղծվել այն բանից հետո, երբ ԲՀԿ–ն առաջարկել է փոփոխություններ կատարել նիստի օրակարգում ու առաջնահերթ քննարկել Երևանի աղբահանության խնդիրը։
«Խնդրի էությունն այդ էմոցիոնալ հարաբերությունների մեջ չէ։ Դա էլ, երևի, իր հիմքն ունի։ Այսինքն` դրան երևի նախորդել է ինչ-որ ոչ ադեկվատ պահվածք, որի արդյունքում այդ ամեն ինչը եղել է։ Բայց պետք չէ կենտրոնանալ դրա վրա։ Պետք է գնալ քաղաքը այս վիճակից հանելու ճանապարհով»,– ասաց Մելքումյանը։
Նշենք, որ Երևանի ավագանու այսօրվա նիստին ներկա են նաև Ազգային ժողովի «Բարգավաճ Հայաստան» խմբակցության պատգամավորներ Նաիրա Զոհրաբյանն ու Միքայել Մելքումյանը։
Պատգամավորները լրագրողներին հայտնեցին, որ հետաքրքրված են հիմնականում Երևանի աղբահանության ու այդ ուղղությամբ Երևանի իշխանության առաջարկած լուծումներով, և, քանի որ օրակարգում այդ հարցը ներառված է, որոշել են ներկա լինել ու հետևել ավագանու աշխատանքներին։
