ԵՐԵՎԱՆ, 22 ապրիլի — Sputnik. ՀՀ գլխավոր դատախազությունը ստուգումներ է իրականացրել ու խախտումներ հայտնաբերել ՀՀ ԱՆ «Հրազդան» և «Աբովյան» քրեակատարողական հիմնարկներում։
Ինչպես հայտնում են ՀՀ դատախազությունից, ստուգման արդյունքում պարզվել է, որ երկու ՔԿՀ–ներում պահվող անձանց տարեկան առնվազն մեկ անգամ չեն ենթարկում բուժկանխարգելիչ հետազոտությունների, ինչը օրենքով ընդունված կարգի խախտում է։ Խցերն ապահովված չեն կենցաղային պարագաներով ու հարմարություններով: Երկու ՔԿՀ-ում էլ առկա են հեռախոսազանգից և տեսազանգից օգտվելու ժամանակացույցի խախտման դեպքեր։
Բացի այդ դատապարտյալների անձնական գործերի ստուգմամբ պարզվել է, որ առանձնակի դաժանության կամ բռնության դեպքեր գրանցած դատապարտյալները հաշվառված չեն իբրև ագրեսիվության, կոնֆլիկտայնության հակում ունեցողներ, ինչը անհրաժեշտ է նրանց սոցիալ-հոգեբանական նախատեսված աշխատանքներն իրականացնելու համար:
«Հրազդան» ՔԿՀ-ում որոշ խցերում հայտնաբերվել են վարագուրապատված քնելատեղեր, ինչը ՔԿՀ-ի ծառայողներին թույլ չի տալիս ամբողջությամբ դիտարկել խցում պահվող անձանց տեղաշարժը: Որոշ խցերում էլ արձանագրվել են քրեական ենթամշակույթին բնորոշ փորագրված կամ նկարված նշաններ:
«Հրազդան» ՔԿՀ–ում չի հայտնաբերել նաև զբոսանքի ժամանակացույց, արձանագրվել են հանձնուքի ընդունման և հանձման գործընթացի խախտումներ։
Փոխարենը բարվոք վիճակում են եղել «Հրազդան» ՔԿՀ-ի տարածքի և կացարանների սանիտարահիգիենիկ պայմանները։
«Հրազդան» ՔԿՀ-ի բժշկական սպասարկման բաժնում բացակայում է ստացիոնար բաժանմունքը, և ստացիոնար բուժման անհրաժեշտության դեպքում դատապարտյալներին ստիպված են լինում տեղափոխել քաղաքացիական հիվանդանոց կամ «Դատապարտյալների հիվանդանոց» ՔԿՀ։
«Աբովյան» ՔԿՀ–ում հիմնական խախտումները վերաբերել են խցերի սանիտարահիգիենիկ պայմաններին, ու դրանց պահպանման համար հերթապահության բացակայությանը։
Ինչպես նշվում է Գլխավոր դատախազության հաղորդագրության մեջ, հայտնաբերված խախտումների մեծ մասը ՔԿՀ-ների վարչակազմերը վերացրել են հենց ստուգումների ընթացքում, մնացածը պարտավորվել են վերացնել հնարավոր սեղմ ժամկետներում։
