ԵՐԵՎԱՆ, 20 ապրիլի — Sputnik. ՀՀ կառավարությունն այս տարվա հունվարի 1-ից մինչև հիմա չի վճարել ՀՀ առաջին նախագահ Լևոն Տեր-Պետրոսյանի գրասենյակի աշխատակիցների աշխատավարձերը: Այս մասին հայտնում է «Ժողովուրդ» օրաթերթը։
«Ընդ որում, խոսքը երեք աշխատակցի աշխատավարձի մասին է: Ի դեպ, կառավարությունը Տեր-Պետրոսյանի գրասենյակի աշխատակիցների աշխատավարձերը չէր վճարել, փոխարենը մյուս երկու պաշտոնաթող նախագահների՝ Ռոբերտ Քոչարյանի ու Սերժ Սարգսյանի գրասենյակների դեպքում նման խնդիր չէր եղել, և այնտեղ բոլորը ստացել էին իրենց գումարը»,–գրում է թերթը։
Երեկ ՀՀ առաջին նախագահի գրասենյակի ղեկավար Ավետիս Ավագյանը խնդրի առնչությամբ թերթի հարցմանն ի պատասխան ասել է, որ կա ձեռք բերված պայմանավորվածություն, որ հարցը շուտով կկարգավորվի. «Խնդիր կա, սակայն դա զուտ տեխնիկական է»:
Հարցին` խնդիրը կարգավորվելու դեպքում մի քանի ամսվա աշխատավարձե՞ր են փոխանցվելու, Ավագյանը պատասխանել է, որ ամեն դեպքում պայմանավորվածությունն այդպիսին է:
