ԵՐԵՎԱՆ, 18 ապրիլի — Sputnik. Ռուս սահմանապահները Հայաստանի և Իրանի սահմանին բռնել են թմրանյութերի հերթական մատակարարին։ Այս մասին հայտնում է Հայաստանում Ռուսաստանի Անվտանգության դաշնային ծառայության մամուլի ծառայությունը։
Դեպքը տեղի է ունեցել ապրիլի 15–ին «Ագարակ» անցակետում, որը գտնվում է Սյունիքի մարզում։
Ռուսաստանի Անվտանգության դաշնային ծառայության Սահմանապահ վարչության աշխատակիցները կանխել են Իրանի Իսլամական Հանրապետությունից թմրամիջոցների մաքսանենգության փորձը:
Սահմանային հսկողության և տրանսպորտային միջոցների ստուգման ժամանակ Մեղրիի սահմանապահ ջոկատի զինծառայողները Իրանի քաղաքացու անձնական իրերում հայտնաբերել են մետոդոն պարունակող 40 հաբ, ինչպես նաև մուգ շագանակագույն նյութով փաթեթ, հավանաբար ափիոն: Տվյալ նյութերը թմրամիջոցներ են համարվում, և, ՀՀ օրենսդրության համաձայն, դրանց շրջանառությունն արգելված է:
Տրանսպորտային միջոցի վարորդը փոխանցվել է ՀՀ իրավապահ մարմինների աշխատակիցներին՝ իրավախախտման բոլոր հանգամանքները պարզելու համար:
