Премьер-министр Армении Никол Пашинян посетил сельскохозяйственный рынок (27 августа 2018). Еревaн

Հայաստանի խաղողագործների բախտը կբերի. կշրջեն լավ մեքենաներով, կունենան լավ կանայք

675
Գինու ազգային կենտրոնի նախագահ Ավագ Հարությունյանի հավաստմամբ` խաղողի գինն այս տարի կտրուկ բարձրանալու է։

ԵՐԵՎԱՆ, 12 ապրիլ — Sputnik. Այսուհետ խաղողագործների բախտը բերելու է, ու նրանք դառնալու են կարգին խաղողագործներ։ Sputnik Արմենիայի հետ զրույցում այս կարծիքը հայտնեց Գինու ազգային կենտրոնի նախագահ Ավագ Հարությունյանը։

«Հայաստանի խաղողագործները, ինչպես Եվրոպայում, շրջելու են լավ մեքենաներով, ունենալու են լավ կանայք»,– ասաց նա։

Բանն այն է, որ գինեգործության ու կոնյակագործության ոլորտից դուրս է գալիս կեղծ արտադրանքը, բնականաբար, կեղծ մթերումներ, կեղծ թվեր այլևս չեն ներկայացվում:

«Մինչև անցած տարի խաղողի մթերման հետ կապված ներկայացվում էին կեղծ թվեր։ Նույնիսկ կրկնակի շատ էին ներկայացնում գնված բերքի քանակը։ Այսինքն` ներկայացնում էին մի թիվ, գնում` այլ քանակությամբ։ Սակայն հիմա այլևս չեն կարող կեղծ տվյալներ ցույց տալ, դրա համար էլ և՛ իրական մթերման քանակը կավելանա, և,՛ դրանով պայմանավորված խաղողի գինն այս տարի կտրուկ կբարձրանա. խաղողագործների բախտը կբերի»,–ասաց Հարությունյանը։

Ապրիլի 1–ին ՀՀ վարչապետ Նիկոլ Փաշինյանը ֆեյսբուքյան իր էջում գրել էր, որ Երևանի կոնյակի գործարանն արդեն իսկ հայտարարել է, որ այս տարի պատրաստվում է նախորդ տարվանից ավելի քան 2000 տոննայով ավել խաղող մթերել` նախորդ տարվա համեմատ 10 դրամ ավելի մթերման գնով։

Անդրադառնալով Փաշինյանի` խաղողի մթերման ծավալների աճի մասին հայտարարությանը` Գինու ազգային կենտրոնի նախագահը նշեց, որ տարիներ ի վեր կոնյակի խաղողի գինը թելադրել է Երևանի կոնյակի գործարանը (ԵԿԳ)։ Խնդիրն այն է, որ ԵԿԳ-ն համեմատաբար շուտ է սկսում խաղողի մթերումները, ու նրա հայտարարած գինը «փարոսի» դեր էր ստանձնում։ Ըստ Հարությունյանի` քանի որ ամենամեծ գնորդը հենց վերոհիշյալ ընկերությունն է եղել, մյուսները սպասել են, որ տեսնեն, թե ինչ գին է պատրաստվում սահմանել գործարանը։

«Սակայն հիմա ամեն ինչ փոխվել է` մրցակցություն է առաջացել դաշտում։ Դեռ անցած տարի էլ շուկայում եղել են ընկերություններ, որոնք ավելի թանկ գին էին առաջարկում խաղողի մթերման համար, քան Երևանի կոնյակի գործարանը»,– ասաց Հարությունյանը։

Նշենք, որ ըստ Ազգային վիճակագրական ծառայության տվյալների` 2018 թ-ին Հայաստանում արտադրվել է 30 մլն 751.9 հազար լիտր կոնյակ, ինչը 2017 թվականի համեմատ աճել է 2,5 տոկոսով: Ինչ վերաբերում է գինու արտադրությանը, ապա վիճակագրության համաձայն՝ նախորդ տարի հանրապետությունում արտադրվել է 8 մլն 877.4 հազար լիտր գինի՝ 2017 թ.-ի համեմատ աճելով 0.3 %-ով:

675
Ըստ թեմայի
Սա ձեզ համար կոլա չէ. ինչու եվրոպացիները չեն հավանում հայկական տնական գինին
Երևանն ու գինին զարմացրել են ռուս հաղորդավարին. ինչո՞ւ է Անդրեյն ուզում նորից գալ Հայաստան
Տավուշցի գինեգործը հարսնացու է փնտրում և պապի բաղադրատոմսով գինի առաջարկում
«Թունդ է, բայց թարմացնում է». ապշած ֆրանսիացիները կօգնեն ճանաչելի դարձնել հայկական գինին