Արմեն Աշոտյան

«Սերժին, որ տեսնես, ասա...». Աշոտյանն անկեղծ զրույց է ունեցել անծանոթ պապիկի հետ

628
(Թարմացված է 17:24 13.04.2019)
ՀՀԿ պատվիրակները զրուցել են մի տարեց տղամարդու հետ, որն իր ասելիքն է փոխանցել նախկին նախագահ Սերժ Սարգսյանին։

ԵՐԵՎԱՆ, 13 ապրիլի— Sputnik. Բրյուսելից վերադառնալիս օդանավակայանում ՀՀԿ պատվիրակությունը մեծ թվով հայ ուղևորների է հանդիպել։ Բարևից ու որպիսությունը հարցնելուց հետո քաղաքական գործիչներն ու քաղաքացիները զրույցի են բռնվել Հայաստանի խնդիրների շուրջ։ Facebook սոցիալական ցանցի իր էջում այս մասին գրում է ՀՀԿ փոխնախագահ Արմեն Աշոտյանը։

Նա պատմում է, որ տարեց մի տղամարդ անկեղծացել է ու ասել. «Աշոտյան ջան, դուք ժողովրդից մի նեղացեք, դուք էլ եք մեղավոր եղել: Մի քիչ էս ժողովրդի դարդերից խոսայիք, մի քիչ բանի տեղ դնեիք, մի քիչ ձեր շրջապատը մաքրեիք, սենց չէր լինի»:

Աշոտյանն այս նկատողությանը ժպիտով պատասխանել է, որ ՀՀԿ–ի շրջապատն արդեն լավ մաքրվել է։ Բայց անծանոթ պապիկը նաև խնդրել է Սերժ Սարգսյանին իր կողմից մի շատ կարևոր պատգամ փոխանցել։

«Սերժին որ տեսնես, ասա իրեն, որ եթե, Աստված չտա, պատերազմ լինի, ինքը պիտի Նիկոլին օգնի: Անպայման կասես: Ինքը խորը մարդ է, ասածս կհասկանա»,– տղամարդու խոսքերն է փոխանցում Արմեն Աշոտյանը։

Հիշեցնենք` ապրիլի 10-ից Հայաստանի Հանրապետական կուսակցությունը մասնակցում էր կենտրոնամետ դեմոկրատների միջազգային միության (IDC-CDI)` Բրյուսելում ընթացող գործադիր մարմնի նիստին, որտեղ դարձել է այդ կազմակերպության լիիրավ անդամ։

628
թեգերը:
Հայաստանի Հանրապետական կուսակցություն (ՀՀԿ), Սերժ Սարգսյան, Արմեն Աշոտյան, Հայաստան
Ըստ թեմայի
Ես հիվանդ մարդկանց հետ գործ չունեմ. Սերժ Սարգսյանը` լրագրողին
Սերժ Սարգսյանը խոսելու է. Աշոտյան
Սերժ Սարգսյանի եղբորորդին կհեռանա՞ Հայաստանից. դատարանը վերադարձրել է նրա անձնագիրը