Սևան

Սևանա լճի մակարդակի բարձրացումը նոր խնդիրնե՞ր կծնի. բնապահպանի մտահոգությունը

58
(Թարմացված է 17:19 08.04.2019)
Բնապահպան Կարինե Դանիելյանի խոսքով`Սևանա լիճը շատ զգայուն է արձագանքում ցանկացած փոփոխության։c

ԵՐԵՎԱՆ, 8 ապրիլի — Sputnik. Սևանա լճի մակադրակը մինչև հունիսի 1-ը կարող է 45 սանտիմետրով բարձրանալ, սակայն դա նոր խնդիրների կհանգեցնի։ Լրագրողների հետ զրույցում նման կարծիք հայտնեց բնապահպան Կարինե Դանիելյանը։ 

Ավելի վաղ ՀՀ ԱԻՆ նախարար Ֆելիքս Ցոլակյանը կառավարության նիստին հայտնել էր, որ այժմ ջրի մակարդակը անցած տարվա նույն ցուցանիշի համեմատ ցածր է 7 սմ–ով։ Կանխատեսումների համաձայն, սակայն, ապրիլ-մայիս ամիսներին տեղումները նորմայից բարձր կլինեն, և ջրի մակարդակը գետերում և լճերում կբարձրանա։

«Հաստատում եմ ստացել Հայպետհիդրոմետից. եթե եղանակը համապատասխանի կանխատեսմանը, ապա մինչև հունիսի 1-ը ջրի մակարդակը կբարձրանա 45 սմ–ով», – ասաց Դանիելյանը։

Նրա խոսքով` այդ դեպքում գրեթե բոլոր ջրամբարները, բացի Ապարանի ջրամբարից, շուրջ 100%–ով կլցվեն, և Սևանա լճից լրացուցիչ ջրառ իրականացնելու անհրաժեշտություն չի առաջանա։

Բայց Սևանա լճում ջրի մակարդակի բարձրացումը նոր խնդիրների կհանգեցնի. հրատապ անհրաժեշտություն կառաջանա տեղափոխել ափին իրականացվող օբյեկտների շինարարությունը, մաքրել ափի երկայնքով ձգվող տարածքը, լուծել կանաչ գոտիների հարցը։ Բնապահպանի խոսքով`լիճը շատ զգայուն է ցանկացած փոփոխության նկատմամբ։

Հիշեցնենք, որ 2018 թվականի ամռանը երկրում ոռոգման ջրի խիստ պակաս կար։ Խնդրի լուծման համար ՀՀ կառավարությունն առաջարկել էր ջրառն ավելացնել 40 մլն խմ–ով և հասցնել մինչև 210 մլն, նախատեսված 170 մլն խմ–ի փոխարեն։ 2018 թվականի օգոստոսի 29-ին խորհրդարանը հաստատել էր համապատասխան օրինագիծը։

Դեռ 2001 թվականին ՀՀ կառավարությունը սկսեց Սևանա լճի էկոհամակարգի վերականգնման միջոցառումներ իրականացնել։

Իշխանությունները նույնիսկ լճի էկոհամակարգի վերականգնման, պահպանման, վերարտադրման, բնական զարգացման և օգտագործման համալիր ծրագիրը հաստատելու մասին օրինագիծ մշակեցին, սակայն Սևանա լճի մակարդակը ցածր է մնում պահանջվող ցուցանիշից։

Ավելացնենք, որ վերջին 10 տարվա ընթացքում Սևանա լճից լրացուցիչ ջրառ էր իրականացվել 5 անգամ։

58
թեգերը:
Ֆելիքս Ցոլակյան, Սևան, Հայաստան
Ըստ թեմայի
Ադամյան. «Կանգնած ենք խնդրի առաջ. ջրբացթողումների հետևանքով փոխվել է Սևանա լճի էկոլոգիան»
Սևանա լճում ձկան որսը բացառելու մասին. 14 հազ. հատ ձուկ ուղարկվել է զորամասեր
Սևանա լճի մակարդակն իջել է. որո՞նք են բացասական բալանսի պատճառները