ԵՐԵՎԱՆ, 20 մարտի — Sputnik. Հայաստանն Իսրայելին չի արտահանձնի իր քաղաքացի Մերի Աղաջանյանին, որն Իսրայելում դատապարտվել է ազատազրկման խարդախության համար։
Մարտի 2–ին «Զվարթնոց» օդանավակայանում ՀՀ ոստիկանության աշխատակիցները ձերբակալել են Թբիլիսի–Երևան չվերթի ուղևոր Մերի Աղաջանյանին, որը հետախուզվում է Իսրայելի իրավապահ մարմինների կողմից` խարդախության մեջ մեղադրանքով։
Ինչպես հաղորդում են իսրայելական ԶԼՄ–ները, Աղաջանյանը եղել է զբոսաշրջության նախարար Ստաս Միսեժնիկովի գրասենյակի պետը։ Գործի նյութերի համաձայն՝ նա կաշառքի դիմաց առանց հերթի սոցիալական բնակարան է խոստացել նոր հայրենադարձներին (ռուսալեզու կենսաթոշակառուներին)։ Խարդախության ճանապարհով ստացված միջոցները կազմել են մի քանի հարյուր հազար շեքել (1 շեքելը` 0,28 դոլար)։ Իսրայելում նա դատապարտվել է 26–ամսյա բանտարկության խարդախության համար։
Հաղորդվում է, որ Աղաջանյանը հասցրել է լքել Իսրայելը հայկական անձնագրով։ Դատախազությունը բռնել է նրան երկրից դուրս գալուց մեկ տարի անց։
Sputnik Արմենիան դիմել է արդարադատության նախարարություն` պարզելու համար, թե պատրաստվում է արդյոք Հայաստանը Աղաջանյանին հանձնել Իսրայելին։
«Հայաստանի Հանրապետության օրենսդրության համաձայն՝ արտահանձնման հարցերով գործերի քննարկումը հրապարակավ չի իրականացվում», – ասվում է հաղորդագրությունում։
Նրա հայկական քաղաքացիության վերաբերյալ Sputnik Արմենիայի հարցին նախարարությունից պատասխանեցին, որ չեն կարող նման տեղեկություն տրամադրել` ելնելով Մերի Աղաջանյանի անձնական տվյալների պաշտպանության անհրաժեշտությունից։ Սակայն մեզ հաջողվեց պարզել, որ Աղաջանյանն իսրայելական քաղաքացիությունից բացի ունի Հայաստանի քաղաքացիություն։
Քանի որ Հայաստանի և Իսրայելի միջև չկա արտահանձնելու մասին երկկողմ պայմանագիր, ապա հարցը կանոնակարգվում է քրեական գործերում փոխադարձ իրավական օգնության մասին եվրոպական կոնվենցիայի շրջանակում։ Մեր ունեցած տեղեկություններով` Հայաստանի իշխանությունները չեն պատրաստվում Իսրայելին արտահանձնել Աղաջանյանին, քանի որ դա հակասում է Հայաստանի սահմանադրությանը։
55 հոդվածի 2–րդ կետն ասում է. «Հայաստանի Հանրապետության քաղաքացին չի կարող հանձնվել արտասահմանության պետությանը` բացառությամբ դեպքերի` նախատեսված Հայաստանի Հանրապետության կողմից վավերացված միջազգային պայմանագրերով»։