Բողոքի ակցիա կառավարության շենքի դիմաց

«Մեր պիկետը համարենք արդյունավետ». Երևանի կենտրոնում կազմակերպված բողոքի ակցիան ցրվեց

81
(Թարմացված է 13:02 18.03.2019)
Գազավորված ըմպելիք արտադրողները 5 հոգանոց կազմով կհանդիպեն փոխվարչապետի հետ։ Հանդիպմանը ներկա կլինի նաև առողջապահության նախարարության ներկայացուցիչը։

ԵՐԵՎԱՆ, 18 մարտի — Sputnik. Գազավորված ըմպելիք արտադրողները վաղը` մարտի 19-ին, կհանդիպեն փոխվարչապետ Մհեր Գրիգորյանի հետ։ Այս մասին ասաց ՀՀ վարչապետի օգնական Նաիրի Սարգսյանը` մոտենալով կառավարության շենքի մոտ բողոքի ակցիա իրականացնող գազավորված ըմպելիք արտադրողներին։

Սարգսյանը նշեց, որ փոխվարչապետն ասել է` մինչև հարցը վերջնական չքննարկի գազավորված ըմպելիք արտադրողների հետ ու որոշում չկայացնեն, առաջ չեն շարժվելու այս հարցում։

«Այսօր փոխվարչապետը հրավիրել է ֆինանսների նախարարության աշխատակիցներին, վաղն էլ 5 հոգով դուք կգաք, ու միասին կքննարկենք հարցը։ Բացի այդ, ուրբաթ ֆինանսատնտեսագիտական նախարարական կոմիտեում բավական երկար քննարկել ենք ձեր հարցը, և հույս ունեմ, որ վաղը վերջնական լուծում կտրվի խնդրին»,–ասաց Սարգսյանը` բողոքի ակցիա իրականացնողների հետ զրույցում։

Նա հավելեց նաև, որ վաղը խնդրի քննարկման ժամանակ կլինի նաև առողջապահության նախարարության ներկայացուցիչը։

«Հայ կոլա» ընկերության տնօրեն Տիգրան Հովսեփյանն էլ նշեց, որ շատ լավ կլինի, որ հենց առողջապահության, տնտեսական զարգացման և ներդրումների նախարարություններից լինեն ներկայացուցիչներ։

«Այսօրվա մեր պիկետը համարենք արդյունավետ, քանի որ մեզ լսեց կառավարությունը։ Սակայն ամեն ինչ կախված է վաղվա քննարկումից, եթե վաղը չգանք ընդհանուր հայտարարի, հինգշաբթի` կառավարության նիստի օրը, կվերսկսենք բողոքի ակցիաները։ Այս անգամ արդեն իսկ մեզ են միանալու գազավորված ըմպելիք արտադրող բազմաթիվ ընկերություններ։ Այսպես չի լինի` մասնագետները պետք է քննարկեն, թե ասպարտամը վնասակար է առողջությանը, թե ոչ, այլ ոչ թե ֆինանսիստները»,–ասաց Հովսեփյանը։

Նա նշեց նաև, որ հեղափոխության օրերին իրենք դուրս էին եկել փողոց` պայքարելու, որպեսզի մենաշնորհը և այլ արատավոր երևույթներ վերանան մեր երկրից, սակայն այս օրենքով, կարծես, հենց մենաշնորհի զարգացումն են խթանելու։ «Ինչո՞ւ պետք է մեր աշխատակիցները (մոտ 100 մարդ) զրկվեն աշխատանքից. մենք իրար հետ մի դաշտի մեջ ենք եղել, մի նպատակ հետապնդել»,– ասաց Հովսեփյանը` դիմելով վարչապետի օգնականին։

Վերջինս էլ արձագանքեց, որ հիմա էլ նրանց հետ նույն դաշտում են։

Հիշեցնենք, որ ՀՀ կառավարության շենքի մոտ հավաքված գազավորված ըմպելիք արտադրողներն այսօր բողոքի ակցիա էին իրականացնում ֆինանսների նախարարության առաջարկած փոփոխությունների դեմ, որով նախատեսվում է 5 տոկոսով ավելացնել գազավորված ըմպելիքների 1 լիտրի համար կիրառվող ակցիզային հարկը։

81
թեգերը:
Հայաստան
Ըստ թեմայի
Դըմփ–դըմփ–հու. գազավորված ըմպելիքի արտադրողները բողոքի ակցիա անցկացրին կառավարության առջև
Պողոսյան. Գազավորված ըմպելիքի ակցիզային հարկի բարձրացումը սոցիալական վատ հետևանք չի ունենա
Գտնել լուծում, որը կբավարարի ոչ միայն գրավատներին, այլև գազավորված ըմպելիք արտադրողներին
Գազավորված ըմպելիքները կթանկանան, Հայաստանում տեղ կբացվի թուրքական արտադրանքի համար
Ինչ է լինելու. գրավատների և գազավորված ըմպելիք արտադրողների ճակատագիրը դեռ անորոշ է