ԵՐԵՎԱՆ, 14 մարտի — Sputnik. Մասնագետները հաշվարկել են Ազգային ժողովի փոխնախագահ Ալեն Սիմոնյանի շրջանառության մեջ դրած «Վիճակախաղերի մասին» և «Շահումով խաղերի, ինտերնետ շահումով խաղերի և խաղատների մասին» ՀՀ օրենքներում փոփոխությունների նախագծերի փաթեթի բացասական հետևանքները։ Այս մասին գրում է «Ժողովուրդ» օրաթերթը։
«Մասնագետները հաշվարկել են՝ ընկերություններից յուրաքանչյուրն ունի 400-ից ավելի աշխատակից, և գրասենյակների փակման դեպքում մեծ թվով մարդիկ կդառնան գործազուրկ: Բացի այդ, բուքմեյքերական գրասենյակները տարածքներ են վարձակալել, ու եթե դրանք փակվեն, խնդիրներ կարող են առաջանալ անշարժ գույքի շուկայում, նաև գույքահարկի հավաքագրման հետ կապված»,– գրում է թերթը։
Միաժամանակ հոդվածագիրը հայտնում է, որ ՊԵԿ-ի տվյալներով` 2017թ.–ին բուքմեյքերական 5 կազմակերպություններ ՀՀ պետբյուջե են փոխանցել 4 մլրդ 212 մլն դրամ, 2018թ.–ին` 4 ընկերություններ փոխանցել են 4 մլրդ 119 մլն դրամ:
«Ժողովուրդը» եզրակացնում է, որ նախագիծն իրականում չի լուծում խաղամոլության դեմ պայքարի խնդիրը։ Ըստ թերթի` բուքմեյքերական գրասենյակների փակման դեպքում ցանկացողները խաղադրույքներ կկատարեն օնլայն:
