Գրավատների տերերի բողոքի ակցիան

«Ուզո՞ւմ են արտագաղթենք». գրավատների համար պետտուրքը նախատեսում են ավելացնել 60 անգամ

190
Նախագիծը կյանքի կոչելու դեպքում գրավատների և փոխանակման կետերի 80-90 տոկոսը կփակվի:

ԵՐԵՎԱՆ, 11 մարտի — Sputnik. Այսօր կառավարության առջև էին հավաքվել գրավատների, փոխանակման կետերի մի շարք ներկայացուցիչներ` իրենց բողոքն արտահայտելու պետական տուրքի բարձրացման նախագծի դեմ։

Գրավատներից մեկի տնօրեն Գրիգոր Աֆյանը Sputnik Արմենիայի հետ զրույցում նշեց, որ նախագծով պետտուրքը գրավատների համար թանկացվում է 100 000 դրամից մինչև 6 մլն դրամ, իսկ բանկերի համար 3 միլիոնից 7 միլիոն դրամ է դառնում, այսինքն` 60 անգամ ավելանում է գրավատների պետտուրքը։ «Խնդիրն այն է, որ պետտուրքն ավելացնում են` հաշվի չառնելով կազմակերպությունների գործառույթների քանակը։ Այսինքն` բանկերն ու վարկային կազմակերպությունները կատարում են մոտ 20 գործառույթ, իսկ գրավատներն ու փոխանակման կետերը մեկ գործառույթ»,–ասաց Աֆյանը։

Մեկ այլ գրավատան տնօրենի` Հրանտ Նալբանդյանի հավաստմամբ էլ` պետական տուրքի նախատեսվող թանկացումը իրավիճակին համահունչ չէ։ Նրա խոսքով` պետտուրքի ավելացման հետևանքով գրավատների և փոխանակման կետերի 80-90 տոկոս կփակվեն, բնականաբար, մյուսներում էլ կրճատումներ կլինեն։ «Ամբողջ շուկան կտուժի, կտուժեն քաղաքացիները, քանի որ բանկերում կան միջնորդավճարներ, նաև մենք վարկեր ենք տրամադրում ավելի արագ։ Կառավարության ներկայացուցիչներին առաջարկում ենք փոփոխություններն անեն համահունչ գրավատների գործառույթներին»,–ասաց Նալբանդյանը։

Նա նշեց նաև, որ իրենց մոտ հարց է առաջանում` ի՞նչ սկզբունքով են պետտուրքի ավելացման չափը որոշել։

Ի դեպ, գրավատների ներկայացուցիչները առարկությունների փաթեթ են պատրաստում կառավարությանը փոխանցելու համար` պահանջելով առաջին հերթին հարցը հանրային քննարկման դնել։ 

Նրանք նշում էին նաև, որ տեղի աշխատակիցների 90 տոկոսից ավելին արական սեռի ներկայացուցիչներն են, որոնք ընտանիքի են պահում։ «Ի՞նչ են ուզում, ուզո՞ւմ են արտագաղթենք»,–ասում էին բողոքողները։

Կառավարության առջև բողոքի ակցիա անողներին մոտեցավ նաև «Իրազեկ և պաշտպանված սպառող» ՀԿ-ի նախագահ Բաբկեն Պիպոյանը` նշելով, որ խնդրի մանրամասներին դեռ ծանոթ չէ և խոստանում է ուսումնասիրել հարցը։ «Հարցը նախ պետք է քննարկել և մանրամասն ծանոթանալ խնդրին։ Ես այն մարդը չեմ, որ առանց խորքային ծանոթանալու, մատերի արանքով նայեմ եղածին ու գնահատական տամ։ Չգիտեի, որ գրավատներն էլ են այսօր հավաքվելու կառավարության առջև։ Ձեր խնդիրն էլ կուսումնասիրեմ, քանի որ պետք է հասկանալ` ինչի՞ համար են նման փոփոխության ուզում գնալ»,–ասաց Պիպոյանը։

ԱԺ փոխնախագահ Ալեն Սիմոնյանը նույնպես լսեց գրավատների ներկայացուցիչների բողոքը` ասելով, որ այսօր` ժամը 14–ին, պետք է հանդիպի իրենցից որոշների հետ` խնդրին ծանոթանալու համար։ Սիմոնյանը խոստացավ խնդիրն ուսումնասիրելուց հետո այն  քննարկել նաև գործընկերների հետ։

190
թեգերը:
ՀՀ կառավարություն, Բողոքի ակցիա, Երևան, Հայաստան
Ըստ թեմայի
Բաքվում դժգոհ են Փաշինյանի` Իրան կատարած այցի արդյունքներից. բողոքի ակցիա է անցկացվել
Հարցը չեն լուծել. աջ ղեկով մեքենաների վարորդները կրկին բողոքի ակցիա են կազմակերպել
Երևանում վարորդները բողոքի ցույց են կազմակերպել. ի՞նչն է պատճառը