ԵՐԵՎԱՆ, 2 մարտի — Sputnik. ԱՄՆ Հետաքննությունների դաշնային բյուրոն օգնել է Հայաստանի քննչական մարմիններին բացահայտել 2013թ-ին Հայաստանի պաշտպանության նախարարության փողերը հափշտակելու գործը։ Այս մասին հայտնում է ՀՀ քննչական կոմիտեն` պատասխանելով Sputnik Արմենիայի հարցմանը։
Փետրվարի 19-ին Հայաստանի քննչական կոմիտեի ղեկավար Հայկ Գրիգորյանը շնորհակալություն է հայտնել ԱՄՆ Հետաքննությունների դաշնային բյուրոյի տարածաշրջանային իրավական կցորդի օգնական Մեթյու Բոյդենին՝ մի քանի հարյուր հազար դոլար հափշտակելու գործը բացահայտելու հարցում աջակցելու համար։
Sputnik Արմենիան դիմեց Քննչական կոմիտե՝ պարզելու համար, թե որ գործի մասին է խոսքը։ Մամուլի ծառայությունից հայտնեցին, որ գործը վերաբերում է «Էյ Ար-Այ Սի Թի» ընկերության տնօրեն Աշոտ Սարգսյանի կողմից 2013թ-ին Հայաստանի պաշտպանության նախարարության հետ ՀՀ ԶՈւ օպերատիվ կառավարման և իրավիճակների վերահսկման կենտրոնի տեսակոնֆերանսհամակարգի ստեղծման համար 485.831.789 դրամ արժեքով պայմանագիր կնքելու և 186.136.615 դրամ խարդախությամբ հափշտակելու գործին։
Սարգսյանը սարքավորումների ուռճացրած գներ է ներկայացրել՝ հաշվի առնելով, որ Հայաստանում նման համակարգեր չկան (համեմատության համար)։ Օգտվելով դրանից՝ նա յուրացրել է 186 միլիոն դրամ (մոտ 455 հազար դոլար)։
«Նախաքննության ընթացքում վարույթն իրականացնող մարմնի` իրավական օգնություն ցույց տալու մասին հարցման հիման վրա ԱՄՆ-ի Հետաքննությունների դաշնային բյուրոյի իրականացրած քննչական գործողությունների արդյունքում ձեռք են բերվել գործի լուծման համար էական նշանակություն ունեցող փաստական տվյալներ»,– նշված է Քննչական կոմիտեի հաղորդագրությունում։
Sputnik Արմենիայի տվյալներով՝ խոսքը վերաբերում է քննությանը սարքավորումներ ձեռք բերելու համար իրական պայմանագրեր տրամադրելու մասին (Սարգսյանը ՊՆ-ին տրամադրել է կեղծ պայմանագրեր ուռճացրած գներով)։
Քրեական գործի շրջանակում կալանք է դրվել տարբեր բանկերում և մասնաճյուղերում մի շարք հաշվարկային և արժութային հաշիվների վրա։
Նշենք, որ սարքավորումները գնել են ամերիկյան, չինական, վրացական և էստոնական ընկերություններից։
Այդ գործով վերջնական որոշում մինչև հիմա չի կայացվել։ Մեղադրյալի առողջական վիճակի պատճառով 2016թ-ից դատական նիստերը հետաձգվում են, իսկ Սարգսյանն ազատ է արձակվել 2 միլիոն դոլար գրավի դիմաց։
Հետաքրքիր է, որ նրա համար երաշխավորել են նախկին գումարման ԱԺ–ի 7 պատգամավորներ։
