ԵՐԵՎԱՆ, 11 փետրվարի — Sputnik. Հայաստանի մարզպետարանների աշխատակազմերի 30 տոկոսը կկրճատվի։ Այսօր լրագրողների հետ զրույցում այս մասին ասաց ՀՀ տարածքային կառավարման և զարգացման նախարար Սուրեն Պապիկյանը։
«Մենք մի քանի մարզպետարաններում ուսումնասիրություն ենք կատարել և եկել այն եզրահանգման, որ այս փուլում մարզպետարանների աշխատակիցների մոտավորապես 30 տոկոսը կկրճատվի»,– ասաց Պապիկյանը։
Նախարարը հայտնեց, որ մարզպետարանների օպտիմալացման ծրագրի համար ներգրավվել է նաև խորհրդատվական ընկերություն, որի ֆինանսավորումը կատարել է Շվեյցարիայի զարգացման գործակալությունը։
Իսկ թե ով է հրաժեշտ տալու աշխատանքին և ով է շարունակելու աշխատել, ըստ Պապիկյանի, որոշվելու է մրցութային կարգով։
«Մրցույթ է անցկացվելու, որի արդյունքում ամենալավ աշխատակիցները պիտի մնան աշխատելու, որովհետև այս օպտիմալացման արդյունքում կատարվող կրճատումները մեկ նպատակ են հետապնդում` արդյունավետ կառավարում և ավելի որակյալ մասնագետների ներգրավում»,– ասաց նա ։
Միաժամանակ Պապիկյանը նշեց, որ աշխատակիցների կրճատումն այս տարի խնայողության չի հանգեցնի, քանի որ մարզպետարանների աշխատավարձերի ֆոնդն արդեն իսկ հաստատված է 2019թ–ի պետական բյուջեով։
Թե երբվանից կկատարվեն կրճատումները, հայտնի չէ, որովհետև նախարարը հստակ ժամկետ չնշեց։
