ԵՐԵՎԱՆ, 7 փետրվարի — Sputnik, Արմենուհի Մխոյան. Գյումրու համայնքապետարանի բնակկոմունալ և շրջակա միջավայրի պահպանության բաժնի նախկին պետ Հովհաննես Գրքիկյանի ազգականները դատի են տվել Գյումրու համայնքապետարանին՝ մեղադրելով անգործություն ցուցաբերելու մեջ:
Հայցվորների պնդմամբ` իրենց պատկանող Գյումրու Բորյան փողոցում գտնվող առևտրի և սպասարկման երկհարկանի օբյեկտը, որի մեջ մտնում է նաև «Դվին» հանդիսությունների սրահը, 45 ամիս շարունակ՝ 2013 թվականից հուլիսի 24-ից մինչև 2017 թվականի ապրիլի 30-ը, կամայականորեն թույլ չեն տվել շահագործել: Ըստ հայցվորների, այս ամենի հետևանքով իրենք կրել են հիսունհինգ միլիոն չորս հարյուր երեսունմեկ հազար հինգ հարյուր քառասուն դրամի (55 431 540) վնաս: Գրքիկյանները դիմել են Շիրակի մարզի ընդհանուր իրավասության դատարան՝ նյութական վնասի փոխհատուցման պահանջով:
Գյումրու համայնքապետի տեղակալ Վաղարշակ Մխիթարյանը լրագրողների հետ ունեցած հանդիպման ժամանակ տվյալ հայցը որակեց «զավեշտալի»:«Այս հայցը զավեշտալի է, քանի որ խոսքը գնում է Գրքիկյաններին պաշտպանող «Դվին» ռեստորանային համալիրի մասին, իսկ ինչպես գիտեք` Գյումրիի և հարակից համայնքների բնակիչների մեծ մասը, տարիներ շարունակ այդ համալիրում հարսանիքների, կնունքների ու այլ միջոցառումների են մասնակցել: Տարիներ շարունակ այդ օբյեկտները շահագործվել են»,-նշեց Վաղարշակ Մխիթարյանը՝ հավելելով «համայնքը ոչ մի գումար վճարելու պարտավորություն չունի»:
Համայնքապետարանի իրավաբանական բաժինը ուսումնասիրել է հայցադիմումը և դատարան է ներկայացրել պատասխան, որում նշված է ,որ հայցադիմումը անհիմն է և զուրկ իրավական որևէ հիմնավորումից:
