Նիկոլ Փաշինյան

Փաշինյանը դրական փոփոխություններ է արձանագրել ՃՏՊ–ների հարցում. ի՞նչն է ոգևորել վարչապետին

145
(Թարմացված է 10:19 07.02.2019)
Հայաստանում այս տարի ՃՏՊ–ներից զոհերն ավելի քիչ են եղել, փոխարենը` վիրավորների թիվն աճել է։

ԵՐԵՎԱՆ, 7 փետրվարի — Sputnik. 2019 թ.–ի հունվարին նախորդ տարվա հունվարի համեմատությամբ ճանապարհատրանսպորտային պատահարների հետևանքով զոհերի թիվն էապես նվազել է։ Այս մասին իր ֆեյսբուքյան գրառման մեջ հայտնում է ՀՀ վարչապետ Նիկոլ Փաշինյանը։

«Ճիշտ է՝ պատահարների ու դրանց հետևանքով վիրավորների թիվն աճել է, բայց նաև ավտոմեքենաների թվի աննախադեպ աճ ենք ունեցել 2018-ին: ՃՏՊ-ների և դրանց հետևանքով վիրավորվածների թվին դասվում են նույնիսկ ամենաթեթև դեպքերը, այնպես որ՝ իմաստ ունի առանձնակի ուշադրություն դարձնել զոհերի թվին»,– գրում է Փաշինյանը:

Վարչապետի համոզմամբ, ներկայացված դինամիկան հուսադրող է:

Նշենք, որ փետրվարի 2–ին Ոստիկանության լրատվության և հասարակայնության հետ կապերի վարչության պետ Աշոտ Ահարոնյանը ներկայացրել էր անցնող հունվարի վիճակագրությունը։

Ըստ նրա` եթե նախորդ տարվա հունվարին հայտնաբերված ճանապարհային երթևեկության տարբեր խախտումների փաստերով կազմվել էր 21798 արձանագրություն, ապա այս տարվա նույն ժամանակահատվածում կազմվել է վարչական իրավախախտումների վերաբերյալ 26698 արձանագրություն. այսինքն` նախորդ տարվա համեմատությամբ 4900-ով ավելի։

Եթե նախորդ տարվա հունվարին ճանապարհային ոստիկանները հայտնաբերել էին 498 ոչ սթափ վարորդ, ապա այս տարի ճանապարհային ոստիկանները հայտնաբերել են մեքենան ոչ սթափ վիճակում վարող 591 վարորդ՝ նախորդ տարվա նույն ժամանակահատվածի համեմատությամբ 93-ով ավելի։

Ըստ Ահարոնյանի` մեծ է նաև պահպանվող հատուկ տարածք տեղափոխված տրանսպորտային միջոցների թիվը։ Այս տարվ հունվարին պահպանվող հատուկ տարածքներ են տեղափոխվել 1115 տրանսպորտային միջոցներ, որոնց վարորդները չարամտորեն խախտել են երթևեկության կանոնները։

Նա նշել է, որ նախորդ տարվա հունվարին ճանապարհատրանսպորտային պատահարների հետևանքով զոհվել է 37 մարդ, իսկ այս տարվա նույն ժամանակահատվածում՝ 21, այսինքն` 16-ով պակաս։

145
թեգերը:
Հայաստան, ՀՀ Ոստիկանություն, Նիկոլ Փաշինյան
թեմա:
ՀՀ վարչապետ Նիկոլ Փաշինյան (611)
Ըստ թեմայի
Շերեմետևոյում ինքնաթիռի տակ հայտնված հայի մահվան առնչությամբ քրեական գործ է հարուցվել
Երևանում իրագործված սպանության հետքերով. 36 տարեկան տղամարդու են ձերբակալել
Տոնական շաբաթվա ընթացքում գրանցվել է 111 արտակարգ պատահար