Ռոբերտ Քոչարյան

Ռոբերտ Քոչարյան. «Մարտի 1-ի մասին ֆիլմում պետք է լինեին նաև Տեր–Պետրոսյանն ու Փաշինյանը»

262
Քոչարյանը փաստաբանի միջոցով պատասխանել է Ռոման Բաբայանի աղմկահարույց ֆիլմին վերաբերող հարցերին։

ԵՐԵՎԱՆ, 31 հունվարի — Sputnik. Ո՛չ Ռոբերտ Քոչարյանը, ո՛չ նրա մերձավոր շրջապատից ինչ–որ մեկը «Գործ համար մարտի 1» ֆիլմի հեղինակներին որևէ հոնորար չեն վճարել։ Այս մասին այսօր դատական նիստի ընդմիջմանը լրագրողներին հայտարարեց ՀՀ երկրորդ նախագահի փաստաբան Հայկ Ալումյանը` լրագրողներին փոխանցելով իր պաշտպանյալի խոսքերը։

Մինչ այդ լրագրողները ֆիլմի մասին հարցերով դիմել էին փաստաբանին։ Նա խոստացել էր Քոչարյանի հետ խոսելուց հետո, նրա թույլտվությամբ պատասխանել հարցերին։

Ալումյանը հայտնեց նաև, որ ֆիլմի նախաձեռնությունը հայտնել է Ռոման Բաբայանը, որի հետ մինչ այդ Քոչարյանն անձամբ ծանոթ չի եղել։

Բաբայանը, Ալումյանի ձևակերպմամբ, «նույնիսկ մարդ էր գցել մեջ, որ կարողանա Քոչարյանից հարցազրույց վերցնել»։

«Որոշ ժամանակ առաջ պարոն Քոչարյանին զանգահարել է մոսկվաբնակ մի հայ և ասել, որ կա հայտնի կինոռեժիսոր, որը ցանկանում է իրենից հարցազրույց վերցնել մարտի 1-ի հետ կապված։ Նա խնդրել է, որ Քոչարյանի համաձայնի հարցազրույց տալ։ Քոչարյանը հարցրել է, թե ուրիշ ովքե՞ր են խոսելու, իրեն ասել են, որ ենթադրվում է` խոսելու են նաև պարոն Փաշինյանը, պարոն Լևոն Տեր–Պետրոսյանը և էլի մի շարք անձինք, ովքեր այդ ընթացքում կարևոր դերակատարություն են ունեցել»,– Քոչարյանի պատմածը լրագրողներին վերապատմեց փաստաբանը։

Ըստ այդմ, Քոչարյանն այս պայմանով է համաձայնել հարցազրույց տալ։ Երկրորդ նախագահի համաձայնությունը ստանալուց 2-3 օր անց ռեժիսորն ու օպերատորները ժամանել են Հայաստան և Քոչարյանից հարցազրույց վերցրել։

«Այդ ընթացքում էլ պարոն Քոչարյանն իմացել է, որ Փաշինյանն ու Տեր–Պետրոսյանը չեն ցանկացել հարցազրույց տալ, թեև իրենց առաջարկվել է։ Թե հետո ֆիլմը ոնց է ստեղծվել, ոնց է մոնտաժվել, ոնց է դրվել շրջանառության մեջ, պարոն Քոչարյանին հայտնի չի եղել»,– ասաց Հայկ Ալումյանը։

Նշենք, որ ռուսաստանաբնակ հայտնի հեռուստալրագրող Ռոման Բաբայանի «Մարտի 1-ի գործը» ֆիլմը ներկայացնում է 2008 թվականի նախագահական ընտրություններին հետևած իրադարձություների տեսախրոնիկան ու մասնակիցների հիշողությունները։

Ֆիլմի սցենարը հեղինակել են Ռոման Բաբայանն ու Անտոն Գրիշինը, ռեժիսորն է Դմիտրի Նովոկշոնովը, պրոդյուսերը՝ երջանկահիշատակ Արթուր Ապրեսովը: Այն հայաստանյան հեռուստադիտողին ներկայացվել է 2019 թ.–ի հունվարի 18–ին, «Հինգերորդ ալիք» հեռուստաընկերության եթերում։

262
թեգերը:
«Մարտի 1–ի» գործով դատավարություն, Ռոբերտ Քոչարյան
թեմա:
Ռոբերտ Քոչարյանի գործը (141)
Ըստ թեմայի
Արցախի զինված ուժերի ներգրավվածություն չի եղել. Մովսես Հակոբյանը` Մարտի 1-ի դեպքերի մասին
Քոչարյանի դեմ մեղադրանքը իրավական տգիտություն է. փաստաբանը` մարտի 1–ի գործի մասին
Մարտի 1–ի գործը սկզբունքային է Հայաստանի, այլ ոչ թե ինձ համար. Փաշինյան
Ի՞նչ կապ ունի Ռոբերտ Քոչարյանի գրասենյակի ղեկավարը Մարտի 1-ի մասին ֆիլմի հետ. տեսանյութ