ԵՐԵՎԱՆ, 31 հունվարի – Sputnik. «Հասարակական կարծիքի ուսումնասիրման կենտրոն» փակ բաժնետիրական ընկերությունը լուծարվում է։ Այս մասին որոշումն այսօր կայացվել է ՀՀ կառավարության հերթական նիստում։
Կառավարության նախաձեռնությունը պայմանավորված է այն հանգամանքով, որ սոցիոլոգիական հետազոտությունների ծառայություններ մատուցող մասնավոր ընկերություններից պայմանագրային հիմունքներով ծառայություններ ձեռք բերելու դեպքում ՀՀ պետական բյուջեից կծախսվի անհամեմատ ավելի քիչ գումար, քան այն գումարը, որը ՀՀ պետական բյուջեից յուրաքանչյուր տարի տարվում է «Հասարակական կարծիքի ուսումնասիրման կենտրոն» փակ բաժնետիրական ընկերությանը իր ընթացիկ ծախսերը հոգալու և կանոնադրական խնդիրները լուծելու համար:
Ի դեպ, կենտրոնի տնօրեն Թամարա Գևորգյանը դեռ սեպտեմբերին, տեղեկանալով կառավարության մտադրության մասին, հայտարարել էր, որ պետական բյուջեից Հանրային հեռուստաընկերությանը հատկացվող 6․5 միլիարդ դրամից ընդամենը իրենց կենտրոնը ստանում է 44 մլն դրամ, ինչը շատ քիչ գումար է հասարակական կարծիքի կենտրոնի գործունեության համար։
«Հասարակական կարծիքի ուսումնասիրման կենտրոնը» լուծարելու նախագիծը մշակել էին է ՀՀ հանրային հեռուստառադիոընկերության խորհուրդը, Տրանսպորտի, կապի և տեղեկատվական տեխնոլոգիաների, Արդարադատության, Ֆինանսների, Տնտեսական զարգացման և ներդրումների նախարարությունները:
